Талабалар учун қўшимча автобус ҳамда поезд қатновлари йўлга қўйилади

Қишки таътил бошланиши муносабати билан Тошкент шаҳридан ҳудудларга жўнаб кетадиган 118 мингга яқин талабанинг уйига хавфсиз етиб бориши ва қайтиб келиши учун амалий чоралар кўрилади.

Олий таълим, фан ва инновациялар вазири раҳбарлигида талабаларнинг қишки таътил даврида доимий яшаш жойига жўнаб кетиши ҳамда таътил даврини мазмунли ташкил этиш бўйича йиғилиш ўтказилди. Унда талабаларнинг қишки таътил даврини мазмунли ташкил этиш, уларнинг таътилни ўз оилалари даврасида ўтказишлари учун зарур шарт-шароитлар яратиш масаласи муҳокама қилинди.

Қайд қилинишича, қишки таътил бошланиши муносабати билан Тошкент шаҳридан ҳудудларга жўнаб кетадиган 118 мингга яқин талабанинг ўз уйига хавфсиз етиб бориши ва қайтиб келиши учун Транспорт вазирлиги ҳамкорлигида амалий чоралар кўрилади.

Жумладан, 26 декабрга қадар, эҳтиёжга кўра Транспорт вазирлиги билан ҳамкорликда қўшимча автобус ҳамда поезд қатновлари йўлга қўйилади.

Тошкент шаҳридан ҳудудларга бир йўналишда жўнаб кетиш истагини билдирган талабалар сони 40 нафардан ошганда, Транспорт вазирлиги томонидан автобус қатнови ташкил этилади.

Аввалроқ, талабалар учун 50 фоиз чегирмага эга имтиёзли авиа ва темирйўл чипталари сотилиши эълон қилинган эди.

#талаба #автобус қатнови #Олий таълим