Ўзбекистонлик автомеханиклар Япониядаги халқаро танловда қатнашади

«I-1 Grand-Prix Isuzu» халқаро техника танловида уч мутахассисдан иборат Ўзбекистон жамоаси ҳам иштирок этади.

14-маротаба ўтказилаётган танлов бу йил 30 октябрь куни Япониянинг Фужисава шаҳрида бўлиб ўтади. Унда ўзбекистонлик техниклар 7-марта қатнашади.

Бу галги мусобақада Ўзбекистон шарафини «SamAuto» МЧЖ мутахассиси Алишер Ҳожиев (жамоа сардори), «Imagine» МЧЖ дилерлик маркази автомеханиклари Элмурод Маҳмудов ва Баҳром Тошпўлатов ҳимоя қилади.

Танловга дунёнинг 30дан ортиқ мамлакатидан юзга яқин автоусталар таклиф этилган. Isuzu`нинг глобал дилерлик тармоғи вакиллари бўлган бу мутахассислар амалий топшириқлар орқали автомобилларга техник хизмат кўрсатиш бўйича маҳорати, ёзма тестларда эса автомобилсозликка оид билимларини синовдан ўтказадилар.

Мусобақани Ўзбекистондан борган журналистлар ҳам кузатиб боради.

Маълумот учун, Ўзбекистон автосаноати Япониянинг Isuzu Motors компанияси билан 2007 йилдан буён ҳамкорлик қилиб келади. Самарқанд автомобиль заводида Isuzu моделидаги автобуслар, юк ва махсус автомобилларнинг ўнга яқин турлари ишлаб чиқарилмоқда.