Жаҳон | 19:30 / 08.04.2018
14879
2 дақиқада ўқилади

Германияда бомба туфайли 26 мингдан кўпроқ одам эвакуация қилинди 

Фото: CC BY-SA 3.0 / Ludger1961 /

Германиянинг Падерборн шаҳрида яшовчи 26 мингдан кўпроқ одам Иккинчи жаҳон уруши вақтидаги бомбанинг зарарсизлантирилиши сабабли эвакуация қилинди. Бу ҳақда DPA ахборот агентлиги хабар бермоқда

Британияга тегишли 1,8 тонналик бомба 1,5 ҳафта олдин уйлардан бирининг боғида аниқланган. Бомба 80 сантиметр чуқурликда бўлган, шу сабабли унинг детонацияси катта вайронагарчиликка олиб келиши мумкин эди.

Ҳукумат бомбадан 1,5 км радиус масофагача эвакуация амалга оширилишини эълон қилган. Эвакуация қилинадиган муассасалар орасида 2 та шифохона, бир нечта қариялар уйи ва университет бўлган. Бундан ташқари, шаҳар тарихий марказининг баъзи туманлари аҳолиси уйларини тарк этишган. 

Ээвакуация қилинганларга вақтинчалик бошпаналар ташкиллаштирилган. Полиция, ўт ўчирувчилар, фавқулодда хизматлар ходимлари ва минглаб кўнгиллилар одамлар хавфли ҳудудни тўлиқ тарк этишлари ортидан кузатишган. 

Германияда ҳар йили 5,5 мингга яқин портламай қолган снарядлар зарарсизлантирилади. Мамлакатда яна ўн минглаб бундай снарядлардан қолмоқда. Германияга уруш вақтида 2 млн дан кўпроқ авиабомба ташланган, улардан тахминан 100 мингтаси портламай қолган.

Энг кўп миқдорда бомбалар Берлинга (68 минг тонна), Гамбургга (45 минг тонна) ва Рур вилоятига (162 минг тонна) ташланган.

Мавзуга оид