Германиялик йигит операциялар ёрдамида оёқларини 24 сантиметрга узайтирди

Германияда бўйи пастлиги сабаб тушкунликда юрган Леон Отремба операция орқали оёқларини узайтиришга қарор қилди. Икки йил ичида унинг бўйи 24 сантиметрга ўсди, аммо энди унинг ҳаёти кучли оғриқлар билан давом этмоқда, деб ёзади Metropoles.

Қайд этилишича, 23 ёшли Отремба бўйи 171 сантиметр бўлганидан жуда уялган, у ўзини пакана деб ҳисоблаб келган. Шу боис у икки йил давомида оёқларини узайтириш бўйича иккита операцияни бошдан ўтказган ва ҳозирда унинг бўйи 195 сантиметрни ташкил этади.

Биринчи операция 2023 йилда амалга оширилган. Ўшанда металл стерженлар ва ташқи фиксатор ёрдамида Леоннинг сон суяклари 10 сантиметрга узайтирилган. Суякларни секин-аста чўзиш учун конструкция ҳар куни 1 миллиметрга тортилган. У операция жойи яллиғланмаслиги учун мунтазам текширувдан ўтиб турган.

Иккинчи операция 2025 йил бошларида ўтказилган. Бу сафар унинг болдир суяклари клик-тизимли ички механизм ёрдамида узайтирилган. Леоннинг таъкидлашича оғриқ у қадар кучли бўлмаган, аммо операциядан кейин ўзини тиклаб олиши учун ойлар керак бўлган. Йигит ҳатто юришни қайтадан ўрганган.

Ўз навбатида ортопедларнинг огоҳлантиришича, бу каби операциялар инсон соғлиғига катта хавф туғдиради. Лучано Миллер исмли шифокорга кўра, оёқларни узайтириш фақат тиббий кўрсаткичлар, масалан, туғма касалликлар ҳолатида амалга оширилиши лозим. Унинг таъкидлашича, шифокорлар аралашуви мушакларга таъсир кўрсатади ва тана биомеханикасини бузади.