Italiyada supermarket tarmoqlaridan biri Isroil mahsulotlarini peshtaxtalardan olib tashladi

Italiyadagi eng yirik supermarket kooperativlaridan biri Coop Alleanza 3.0 Isroilning G‘azoga hujumlari va Falastin aholisini gumanitar blokadaga olishiga norozilik sifatida Isroilning bir qator mahsulotlari sotuvdan olib tashlanganini e’lon qildi.

E’lon qilingan bayonotda tarmoq rahbariyati Coop Alleanza 3.0'ning Yaqin Sharqdagi voqealar bo‘yicha pozitsiyasi uzoq vaqtdan beri ma’lum ekanligini ta’kidladi: «Biz G‘azoda davom etayotgan zo‘ravonliklarga befarq qola olmaymiz. Kooperativ har doim harbiy amaliyotlarni zudlik bilan to‘xtatish chaqiriqlarini qat’iy qo‘llab-quvvatlagan, Isroil hukumati gumanitar yordam yetkazilishiga to‘sqinlik qiladi». 

So‘nggi haftalarda mintaqada keskinlik kuchayib borayotganiga e’tibor qaratilgan bayonotda, Coop Alleanza 3.0 izchil qaror qabul qilib, yeryong‘oq, tahin va Sodastream mahsulotlarini o‘z ichiga olgan ba’zi Isroil mahsulotlarini peshtaxtalardan olib tashladi. Bunday qarorga, shuningdek, Etika komissiyasining avvalgi direktorlar kengashiga taqdim etgan hisoboti ham sabab bo‘lgan.

Isroil mahsulotlarini boykot qilishdan tashqari, kooperativ G‘azo aholisi bilan birdamlik kampaniyasi boshlanganini e’lon qildi. Xususan, Coop Alleanza 3.0 Coop For Refugees milliy tashabbusida ishtirok etadi va yaqinda o‘zining mahsulot qatoriga Gaza Cola'ni qo‘shdi — bu loyiha 100 foiz falastinlik ishlab chiqaruvchilarga tegishli. Ushbu ichimlikni sotishdan tushgan mablag‘ G‘azo sektoridagi shifoxonani qayta qurishga yo‘naltiriladi.