Jamiyat | 20:04 / 26.06.2025
2175
2 daqiqa o‘qiladi

Andijon va Jizzaxda tibbiyot birlashmalariga pul evaziga ishga joylashtirishni va’da qilgan shaxslar ushlandi

Aniqlanishicha, Paxtaobod tumani tibbiyot birlashmasining kadrlar bo‘limi nazoratchisi ishga joylashtirish evaziga fuqarodan 500 dollar talab qilgan.

Foto: Bosh prokuratura huzuridagi departamen

Bosh prokuratura huzuridagi departament Paxtaobod va Do‘stlik tumanlari tibbiyot birlashmalariga ishga joylashtirib qo‘yishni va’da qilgan shaxslar qo‘lga olinganini ma’lum qildi.

Qayd etilishicha, departamentning Paxtaobod tumani bo‘limi va IIB xodimlari hamkorligida tezkor tadbir o‘tkazilgan. Tadbirda Paxtaobod tumani tibbiyot birlashmasining kadrlar bo‘limi nazoratchisi B.X. fuqaro M.S.ning ishonchiga kirib, ushbu tibbiyot birlashmasiga ishga joylashtirib qo‘yishi evaziga 500 dollar olgan vaqtida ashyoviy dalillar bilan ushlangan.

Shu kabi, departamentning Jizzax shahri bo‘limi va IIB xodimlari hamkorligida o‘tkazilgan tezkor tadbirda X.E. ismli shaxs fuqaro Sh.A.ning ishonchiga kirib, uni Do‘stlik tumani tibbiyot birlashmasiga ishga joylashtirib qo‘yishi evaziga 21 million so‘mni firibgarlik yo‘li bilan olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 168-moddasi (firibgarlik) bilan jinoyat ishlari qo‘zg‘atilib, tergov harakatlari o‘tkazilmoqda.

Mavzuga oid