Rossiya Mudofaa vazirligi bir haftada 13 ta aholi punkti nazoratga olinganini ma’lum qildi

Rossiya Mudofaa vazirligi Ukrainaning Xarkiv viloyatidagi Kondrashovka aholi punkti Rossiya qo‘shinlari nazoratiga o‘tganini ma’lum qildi. Bu haqda 30 may, juma kuni Rossiya Mudofaa vazirligi matbuot xizmati xabar berdi.

Kodrashovka aholi punkti «Zapad» kuchlar guruhi bo‘linmalarining qat’iy harakatlari natijasida nazoratga olindi», — deyiladi Rossiya idorasi xabarida.

Hammasi bo‘lib 24-30 may kunlari 13 ta aholi punkti rus qo‘shinlari nazoratiga o‘tdi: Sumi viloyatidagi Loknya, Vladimirovka, Belovodiy va Konstantinovka, Xarkiv viloyatidagi Stroyevka va Kondrashovka, Donetsk viloyatidagi Stupochki, Romanovka, Staraya Nikolayevka, Gnatovka, Shevchenko, Otradnoye va Zelenoye Pole», deyiladi Mudofaa vazirligi hisobotida.

«Joriy yilning 24-30 may kunlari Kiyev rejimining Rossiya Federatsiyasi hududida fuqarolik nishonlariga samolyot tipidagi zarba beruvchi uchuvchisiz uchoqlar va G‘arbda ishlab chiqarilgan raketalardan foydalangan holda amalga oshirgan ommaviy hujumlariga javoban Rossiya Qurolli kuchlari Ukraina mudofaa sanoatining yuqori aniqlikdagi qurollari korxonalariga beshta guruhli va ikkita ommaviy zarbalar berdi», — deyiladi xabarda.

Zarbalarning maqsadlariga erishildi. Idoraning ta’kidlashicha, barcha belgilangan harbiy obektlar zarbaga uchragan.

«Bir hafta davomida havo hujumidan mudofaa tizimlari Ukraina Havo kuchlarining MiG-29 samolyotini, 30 ta JDAM boshqariladigan havo bombalarini va AQShda ishlab chiqarilgan HIMARS tizimining 16 ta raketasini, shuningdek, samolyot tipidagi 1439 ta uchuvchisiz uchish apparatlarini urib tushirdi, shu jumladan, 907 tasi maxsus harbiy operatsiya zonasidan tashqarida yo‘q qilindi», deya qo‘shimcha qildi Rossiya Mudofaa vazirligi.