Rossiya Shimoliy Koreyaga havo mudofaa tizimlarini yetkazib beryapti - MSMT

29 may, payshanba kuni e’lon qilingan AQSh, Germaniya, Janubiy Koreya, Yaponiya va boshqa davlatlardan iborat Ko‘p tomonlama sanksiyalar monitoringi guruhi (MSMT) hisobotiga ko‘ra, o‘tgan yil oxiridan beri Rossiya Shimoliy Koreyani uzoq masofaga uchuvchi qurollar bilan ta’minlab kelmoqda.

Xususan, guruh Moskva Pxenyanga kamida bitta «Pansir» havo hujumiga qarshi zenit-raketa mudofaa tizimini yetkazib berganini aniqladi. Bu BMTning KXDRga qarshi, unga qurol yetkazib berishga embargo qo‘yishni nazarda tutgan sanksiyalariga ziddir.

Ko‘p tomonlama sanksiyalar monitoringi guruhi 2024 yil oktyabr oyida AQSh va Janubiy Koreya tashabbusi bilan Shimoliy Koreyaga qarshi sanksiyalarni kuzatish uchun tuzilgan. MSMT'da jami 11 ta davlat ishtirok etadi.

Guruhning tashkil etilishidan oldin Rossiya tashabbusi bilan BMTning tegishli ekspertlar kengashi tarqatib yuborilgan edi. U nashr etadigan axborot MSMT a’zolari bo‘lgan mamlakatlar maxsus xizmatlari ma’lumotlariga asoslanadi.