Xorazmda metallolomga topshirilgan snaryad portlab ketdi. Bir kishi halok bo‘ldi

Yangiariq tumanidagi metallom yig‘ish shoxobchasida portlash yuz bergan. Bu haqda Kun.uz manbasi xabar qildi.

Hodisa 11 aprel kuni sodir bo‘lgan. Yig‘ib kelingan temir-tersaklar tushirilayotganda ular orasida bo‘lgan snaryad portlab ketgan. Oqibatda shu yerda ishlovchi 31 yoshli O.B. og‘ir tan jarohati olib, vafot etgan.

Ijtimoiy tarmoqlarda ham bu hodisaga oid xabarlar tarqaldi. Unda aytilishicha, portlashdan so‘ng voqea joyiga huquq-tartibot organlari xodimlari va sapyorlar yetib borgan. O‘rganish jarayonida shoxobchadan yana 30 ga yaqin snaryad topilgan.

Internetda tarqalgan videoda marhum O.B.ning onasi o‘g‘li oila boquvchisi bo‘lganini, uning 2 farzandi yetim qolganini aytgan. Ona snaryadlarni sotgan va sotib olib shoxobchaga keltirgan shaxslarga qat’iy jazo qo‘llashni so‘ragan.

Hozirda mazkur ishni harbiy prokuratura o‘rganmoqda. Kun.uz holatga oydinlik kiritish maqsadida Bosh prokuratura matbuot xizmatiga murojaat qildi.

Xabar tahrirlandi. Ushbu xabarning birlamchi tahririda Kun.uz manbasi snaryadlar metallolom sifatida Qoraqalpog‘istonning Amudaryo tumanida harbiy xizmatchilardan sotib olinganini aytgani haqida ma’lumot berilgandi. Mudofaa vazirligi buni rad etdi. Vazirlikka ko‘ra, portlagan snaryad mahalliy cho‘ponlar tomonidan o‘zboshimchalik bilan qazib olingan va metallolomga topshirilgan.

«Bunday holatlarda fuqarolar xavfsizlik qoidalariga rioya qilgan holda huquqni muhofaza qiluvchi organlarga zudlik bilan xabar qilishi shart.

Ushbu voqeaga harbiy xizmatchilarning hech qanday aloqasi yo‘q va jinoiy javobgarlikka tortilmaganini ma’lum qilamiz. Mazkur turdagi snaryad O‘zbekiston Qurolli Kuchlarida mavjud emas. Ma’lumotlarga ko‘ra, bu turdagi snaryad 1970 yillarda qo‘llangan», — deyiladi Mudofaa vazirligi axborotida.