Madrid yaqinida ukrainalik siyosatchi Andrey Portnov otib ketildi. U Yanukovichning sobiq safdoshi edi

Madrid provinsiyasidagi Posuelo-de-Alarkon shahrida joylashgan Amerika maktabi darvozasi oldida Ukraina sobiq prezidenti Viktor Yanukovich ma’muriyati boshlig‘ining sobiq o‘rinbosari Andrey Portnov otib ketildi, deb xabar beradi Reuters.

Ma’lumotlarga ko‘ra, politsiya mahalliy vaqt bilan soat 09:15 da o‘q uzilgani to‘g‘risida xabar olgan. Shu bilan birga, politsiya qurbonning kimligini oshkor etmagan. Sky News’ning aniqlik kiritishicha, Portnov bolalarini maktabga olib borganida noma’lum shaxs unga o‘q uzgan.

51 yoshli Portnov Lugansk oblastida tug‘ilgan, advokatlik faoliyati bilan shug‘ullangan, 2006 yilda Ukraina Oliy radasi xalq deputatligiga saylangan. 2010 yilda Yuliya Timoshenkoning mag‘lubiyatidan keyin sudda uning manfaatlarini himoya qilgan. 2011-2014 yillarda Portnov prezident Viktor Yanukovichning maslahatchisi bo‘lgan; Maydondagi norozilik namoyishlari vaqtida Yanukovich bilan birga siyosiy inqirozni hal etish bo‘yicha ishchi guruh tarkibiga kiritilgan.

Keyinroq Yanukovich ma’muriyatida Portnov Prezident administratsiyasi rahbari o‘rinbosari bo‘lgan. U Ukrainani 2015 yil boshida tark etgan.

AQSh Portnovga qarshi 2021 yilda sanksiyalar joriy etgan. Bunga u pora orqali «Ukrainaning sud va huquqni muhofaza qilish apparati bilan keng aloqalar o‘rnatgani» va o‘z ta’sir doirasidan «Ukraina sudlarida qaror qabul qilinishida» foydalangani sabab qilib ko‘rsatilgan. 2019 yilda Portnov Ukrainaga qaytishini e’lon qilgandi. U saylovlarda Volodimir Zelenskiyni qo‘llab-quvvatlagan va sobiq prezident Pyotr Poroshenko ustidan Davlat tergov byurosiga uni lavozimida bo‘lgan vaqtida «jinoiy harakatlar»da ayblab, shikoyatlar berishni boshlagan. 2022 yil iyunda «Sxemi» surishtiruv loyihasi Portnov Ukrainadan chiqib ketganini aniqlagan edi.