Buxoro va Xorazmni bog‘lovchi yo‘lni chigirtkalar bosdi

Ijtimoiy tarmoqlarda Buxoro va Xorazm viloyatlarini bog‘lovchi A380-avtomobil yo‘lida chigirtkalar to‘dasi yurgani aks etgan video tarqaldi.

O‘simlik karantini va himoyasi agentligining bildirishicha, mazkur hududda saksovul bukri chigirtkasi to‘dasi aniqlangan. Ularni o‘z vaqtida talafotsiz bartaraf etish maqsadida Buxoro viloyatining Chigirtka va tut parvonasiga qarshi kurash xizmati ikkita otryadga bo‘lingan holda 4509 gektar maydonda kimyoviy ishlovlar olib borgan.

Favqulodda vaziyatlar vazirligi ushbu hududlarda 15 ta maxsus texnika yordamida kimyoviy ishlovlar berilgani, hozirda vaziyat to‘liq nazoratga olinganini ma’lum qildi.

Buxoro viloyatining Gazli massivi, Romitan, Qorako‘l, Jondor tumanlari alohida nazorat ostiga olingan va ularda ham kuzatuv-monitoring ishlari davom etmoqda.

10 may holatiga ko‘ra, respublika bo‘yicha 472 ming 739 gektar maydonda kuzatuv olib borilgan. Monitoring natijasida 267 ming 267 gektar maydonda zararli chigirtka tarqalgani aniqlangan. Shundan 244 ming 530 gektarda kimyoviy ishlovlar o‘tkazilgan.

«Alohida qayd etib o‘tamiz, saksovul bukri chigirtkasi qishloq xo‘jaligi ekinlariga zarar yetkazmaydi. Hududlardagi tezkor shtablar tomonidan murojaatlar o‘rganilib, aniqlangan o‘choqlar qisqa fursatlarda bartaraf etilyapti», – deyiladi O‘KHA xabarida.

Iqlimshunos Erkin Abdulahatov bu o‘tgan yildagi kabi Gazli shaharchasi atrofidagi marokash chigirtka bosqini kabi juda xavfli hisoblanmasligini, shunga qaramay, bu chigirtkalar tarqalish xavfi oldini olish kerakligini ta’kidlagan.

O‘simlik karantini va himoyasi agentligi fuqarolardan zararli chigirtka tarqalgan maydonlar to‘g‘risida 1288 yoki 71 202 10 00 raqamlariga murojaat qilishlni so‘ramoqda.

Bundan tashqari, tashkilotning barcha rasmiy sahifalarida Hududiy chigirtka va tut parvonasiga qarshi kurash xizmati rahbarlari va bosh agronomlarning telefon raqamlari ko‘rsatib o‘tilgan. Xizmatlar va kimyoviy vositalar mutlaqo bepul, deyiladi xabarda.