SCMP: Xitoy kompaniyalari ishlab chiqarishni AQShga ko‘chirishni boshladi

Neft-kimyodan tortib suvenirlar ishlab chiqarishgacha ixtisoslashgan Xitoy kompaniyalari ikki davlat o‘rtasida kuchayib borayotgan savdo urushi oqibatlaridan qutulishga urinib, AQShda o‘z faoliyatini yo‘lga qo‘ymoqda. Bu haqda South China Morning Post yozmoqda.

Xitoy kompaniyalariga Qo‘shma Shtatlarda ishlab chiqarishni mahalliylashtirishga yordam beradigan konsalting kompaniyasi rahbari Chju Ning gazetaga so‘nggi to‘rt oyning o‘zida kamida 100 ta so‘rov olganini aytdi, bu «o‘tgan yildagi jami so‘rovga teng».

«Buyurtmalarimizning qariyb 95 foizi Qo‘shma Shtatlar hissasiga to‘g‘ri keladi. Bu biz yo‘qotishimiz mumkin bo‘lgan bozor emas», — deya sharqiy Xitoydagi sovg‘alar ishlab chiqaruvchi biznes egasi Rayan Chjoudan iqtibos keltiradi gazeta. Hozir u Dallasda (Texas) yangi zavod ochishga harakat qilmoqda.

«Biz aminmizki, AQSh dollari dunyoda hukmronligicha qolar ekan, Amerika eng yirik iste’mol bozori bo‘laveradi», dedi Rayan Chjou.

Shenjyenda joylashgan elektron komponentlar kompaniyasi bosh direktori Leo Li shu oy boshida Nevada shtatida yangi zavod ochdi. Zavod kichik ta’minot zanjirlari va kam mehnat talablari bo‘lgan sensor modullarini yig‘ish uchun mo‘ljallangan. «Ha, mening xarajatlarim oshadi, lekin 145 foizlik tariflar kabi yomon bo‘lmadi. Maqsadimiz — mavjud buyurtmalar hajmini saqlab qolish», — deya ta’kidladi tadbirkor.

Pekinda joylashgan Chem1 konsalting firmasi asoschisi Ye Ingminning so‘zlariga ko‘ra, neftni qayta ishlash bilan shug‘ullanuvchi neft-kimyo kompaniyalari uchun AQShda zavodlar qurish hozirgi sharoitda ayniqsa mantiqiy qadamdek ko‘rinyapti. Ilgari kompaniyalar xomashyoni Qo‘shma Shtatlardan import qilib, keyin qayta ishlangandan so‘ng tayyor mahsulotlarni Amerikaga jo‘natishardi. Ammo bu biznes modeli endi kompaniyalarni tariflarni ikki baravar oshirishga majbur qilmoqda, dedi u. «Xomashyo umumiy xarajatlarning 80 foizidan 90 foizigacha bo‘lgan neft-kimyoni qayta ishlash sanoati uchun hatto 10 foiz tarif ham sezilarli ta’sir ko‘rsatadi», dedi Ye Ingmin.