Ta’lim tili o‘zbek tili bo‘lmagan sinf bitiruvchilari ham davlat tilidan imtihon topshiradi

Maktabgacha va maktab ta’limi vazirining «Umumiy o‘rta ta’lim oluvchilarning yakuniy davlat attestatsiyasi to‘g‘risidagi nizomga kiritilgan o‘zgartirish va qo‘shimcha kiritish haqida»gi buyrug‘iga ko‘ra, endi ta’lim tili o‘zbek tili bo‘lmagan sinf bitiruvchilari ham davlat tilidan imtihon topshiradi.

Hujjatga muvofiq, bitiruvchi sinflarda yakuniy attestatsiya o‘tkaziladigan fanlar ro‘yxati, shakli va muddatlari har o‘quv yilida Maktabgacha va maktab ta’limi vazirligi tomonidan tasdiqlanadi. Bunda ushbu ro‘yxatga ta’lim tili o‘zbek bo‘lmagan maktablar uchun davlat tili majburiy fanlar blokiga kiritiladi.

Yakuniy davlat attestatsiyasi doirasida 11-sinf bitiruvchilari majburiy hamda tanlov fanlari bo‘yicha yakuniy attestatsiyadan o‘tkaziladi. Bunda tanlov fanlari ro‘yxatidan bitiruvchi oliy ta’lim tashkilotiga kirish imtihonidagi o‘z tanlagan yo‘nalishga mos fanlarni tanlashi mumkin.

Yakuniy attestatsiyada kuzatuv kengashi hamda fuqarolarning o‘zini o‘zi boshqarish organlari vakillari jamoatchilik asosida kuzatuvchi sifatida qatnashishlari mumkin.

Xorijiy tillar hamda umumta’lim fanlari bo‘yicha milliy yoki xalqaro tan olingan sertifikatga ega bo‘lgan o‘quvchi yakuniy attestatsiya topshiriladigan fandan ozod etiladi. Xorijiy tillar hamda umumta’lim fanlari bo‘yicha milliy va xalqaro tan olingan sertifikatlar ro‘yxati Maktabgacha va maktab ta’limi vazirligi tomonidan tasdiqlanadi.

Eslatib o‘tamiz, fevral oyida 2025 yilidan boshlab ta’lim o‘zbek tilida olib borilmaydigan umumiy o‘rta ta’lim muassasalarining 11-sinf bitiruvchilari uchun ham davlat tilidan yakuniy nazorat imtihonlarini topshirish majburiy bo‘lishi to‘g‘risida xabar berilgandi.