Sertifikatlash va texnik nazorat sohasidagi islohotlar: nimalar o‘zgaradi va bu bizga nima beradi?

Bu nima degani?

Avvallari oziq-ovqat mahsulotlari, bolalar ovqatlari, ichimliklar yoki o‘simlik mahsulotlarini ishlab chiqarish va chetdan olib kirish uchun turli xil ruxsatnomalar, sanitariya va veterinariya xulosalari, sertifikatlar olinishi shart edi. Bu esa ko‘p vaqt, mablag‘ va hujjatlashtirishni talab qilardi.

Endilikda:

1. Mahalliy va import oziq-ovqat mahsulotlari uchun laboratoriya natijalari asosida alohida sanitariya-epidemiologik sertifikat olish talab qilinmaydi.

2. Bolalar ovqatlari, parhez mahsulotlar, biologik faol yoki yangi texnologiya asosida ishlab chiqilgan oziq-ovqatlar uchun texnik hujjatlarni (retsept, qadoqlash, markirovka, ishlab chiqarish shartlari va boshqalar) Sog‘liqni saqlash vazirligi bilan majburiy kelishish shart emas.

3. Alkogolsiz ichimliklar uchun qo‘shimchalar yoki butlovchi qismlarni mamlakatga olib kirishda har bir partiya uchun alohida sertifikat talab etilmaydi.

4. Fitosanitariya sertifikati faqat gigiyenik yoki veterinariya xulosasi mavjud bo‘lmagan hollarda so‘raladi.

5. O‘simlik mahsulotlari, matolar, ipak, g‘alla, paxta, o‘yinchoqlar va sport anjomlari uchun veterinariya sertifikatlash vaqtincha bekor qilinmoqda.

Bu islohotlar nimasi bilan muhim?

– tadbirkorlar uchun qulaylik yaratiladi – ishlab chiqarish yoki import jarayoni soddalashadi;

– vaqt va xarajat tejaladi – byurokratik to‘siqlar kamayadi, hujjatlarni olishga ketadigan mablag‘ qisqaradi;

- mahsulotlar tezroq bozorga chiqadi – yangi retsept yoki texnologiya asosida ishlab chiqarilgan mahsulotlar tez fursatda iste’molchiga yetkaziladi;

- ichki bozor faollashadi – soddalashtirilgan tartiblar bozor raqobatini oshiradi, natijada iste’molchi uchun mahsulotlar xilma-xil va nisbatan arzon bo‘ladi.

Xullas, ushbu islohotlar ortiqcha hujjatbozlikni kamaytirish, ishlab chiqaruvchilar va importyorlar faoliyatini yengillashtirish, shuningdek, bozor mexanizmlarini faollashtirishga xizmat qiladi.