Mast holda rulga o‘tirganlar, «zakladchik»lar va imtihondan o‘tolmayotgan haydovchi – tungi reydda kimlar ushlandi?

Kun.uz muxbiri Toshkent shahar IIBB YHXB xodimlari bilan tungi reydga chiqdi.

15 apreldan 15 mayga qadar poytaxtda «Xavfsiz va sog‘lom yurt oyligi» doirasida Toshkent shahar IIBB xodimlari tomonidan tungi vaqtlarda kuchaytirilgan reydlar o‘tkazilmoqda. Kun.uz muxbiri navbatdagi tungi reyd tadbirlarida ishtirok etdi.

Reyd davomida mast holatda atrofdagilar tinchligini buzgan yoshlarga ogohlantirish berilgan, qoidabuzarlik sodir etgan hamda haydovchilik guvohnomasisiz mashina boshqargan haydovchilarga chora ko‘rilgan. 

21 yoshli haydovchi guvohnomasi yo‘qligini uch marta imtihonga kirgani, ammo savollar qiyinligi tufayli o‘ta olmagani bilan tushuntirgan.

Shuningdek, ikki holatda mashina rulida mast holatda bo‘lgan haydovchilar qo‘lga tushgan. Xususan, mast holda avtomobil boshqargan bankir tibbiy ko‘rikdan bosh tortganiga qaramay, belgilangan qonuniy jazo chorasidan qutulib qola olmagan. 

Mirzo Ulug‘bek tumanida esa tungi vaqtlarda ko‘zdan pana joylarga noma’lum o‘tkir hidli moddalarni yashirish yo‘li orqali tarqatib yurgan ikki gumondor shaxs hududiy profilaktika inspektori tomonidan qo‘lga olindi. Xolislar ishtirokidagi tekshiruvlarda ular o‘z aybiga to‘liq iqror bo‘lib, ushlangunga qadar, yashirib chiqqan narkotik moddalarni o‘z ixtiyori bilan topshirdi.

To‘liq videoni quyidagi havola orqali tomosha qilish mumkin.