O‘zbekistonda umummilliy birdamlik bog‘lari tashkil etiladi

Umummilliy birdamlik bog‘lari sokin, yashil hududlar bo‘ladi. U yerda piknik qilish uchun zonalar, yosh bolalar uchun maxsus jihozlangan qumloqlar, kichik kutubxonalar, tasviriy va amaliy san’at bilan shug‘ullanish uchun maydonchalar bo‘ladi. Velosiped yo‘lakchalari va bolalar attraksionlari bo‘lishi ham ko‘zda tutilgan.

Foto: Kun.uz

O‘zbekistonda 2025–2030 yillarda umummilliy birdamlik bog‘lari tashkil etiladi. Hukumatning 17 aprel kungi qarori bilan, bu borada kompleks chora-tadbirlar dasturi tasdiqlandi.

Qarorga ko‘ra, umummilliy birdamlik bog‘larining namunaviy loyihasi 15 maygacha tasdiqlanishi kerak.

Bog‘larning 60 foiz hududida yashil maydon sifatida daraxt va butalar ekish, piknik zonalar, yosh bolalar uchun maxsus jihozlangan qumloqlar, ochiq osmon ostidagi kichik kutubxonalar, tasviriy va amaliy san’at bilan shug‘ullanish hududlari hamda tashrif buyuruvchilar tinchligini buzmaydigan boshqa elementlar orqali sokin hududlar tashkil etish ko‘zda tutilmoqda.

Sokin hududlarni tashkil etishda daraxt va butalarga zarar yetkazmaslik va nobud qilmaslik maqsadida jamoatchilik nazoratini kuchaytirish orqali qo‘riqlanadigan chegaralar belgilanadi, daraxtlarni sug‘orish tizimi qayta ko‘rib chiqiladi va samarali faoliyati ta’minlanadi.

Bog‘lar hududida velosiped yo‘lakchalari, bolalar attraksionlari va oilaviy dam olish uchun boshqa obektlarni o‘z ichiga olgan oilaviy madaniy dam olish maydonlari ham bo‘ladi.

#kutubxona #bog‘ #bolalar #istirohat bog‘i #shaharsozlik #ekologiya