Istanbulda o‘zbekistonlik ayol erini o‘ldirishda gumonlanmoqda

Turkiyaning Istanbul shahrida o‘zbekistonlik ayol turmush o‘rtog‘ini pichoqlab o‘ldirdi. Bu haqda mahalliy nashrlar xabar tarqatdi.

Xabarlarda aytilishicha, 6 aprel kuni Istanbulning Kartal tumanida yashovchi er-xotin o‘rtasida janjal kelib chiqqan. Janjalga moliyaviy muammolar sabab bo‘lgani, jarayon davomida O‘zbekiston fuqarosi, 28 yoshli S.T. oshxonadan pichoq olib, 42 yoshli E.E.ni yaralagani ma’lum qilingan.

Shundan so‘ng S.T. taksoparkka qo‘ng‘iroq qilib, turmush o‘rtog‘i kasalxonaga borishi kerakligini aytib, mashina so‘ragan. Taksi haydovchisi hushsiz yotgan erkakni ko‘rib, tez yordam chaqirgan. Voqea joyiga yetib kelgan shifokorlar uning o‘limini qayd etgan. Ayol politsiya xodimlari tomonidan qo‘lga olingan.

Ma’lum bo‘lishicha, 4 yil oldin turmush qurgan juftlikning bir nafar farzandi bor.

O‘zbekistonning Istanbul shahridagi Bosh konsulxonasi ayblanayotgan fuqaroning xolasi bilan suhbatlashgani haqida xabar berdi. Unga ko‘ra, haqiqatan ham, mazkur voqea yuzasidan gumonlanuvchi huquqni muhofaza qiluvchi organlar tomonidan ushlangan.

Dastlabki ma’lumotlarga ko‘ra, Turkiya fuqarosi spirtli ichimlik iste’mol qilgan, u o‘zbekistonlik ayoliga nisbatan muntazam ravishda jismoniy va ruhiy bosim o‘tkazib kelgan.

Konsulxona xabarida voqea sodir bo‘lgan vaqtda xonada boshqa shaxslar ham bo‘lgani aytiladi. «Dastlabki tergovga ko‘ra, marhum ayolni bo‘g‘ayotgan paytda orqa tomondan pichoq bilan jarohatlangan. Bu esa uni boshqa shaxs tomonidan pichoqlangan bo‘lishi ehtimolini istisno etmaydi», – deya qo‘shimcha qilinadi xabarda.

Ayblanuvchining xolasi, o‘z navbatida, hali uning jiyani sud tomonidan aybdor deb topilmagani, shuning uchun voqea haqida xabar tarqatayotganda buni hisobga olishni so‘radi. Shuningdek, voqeadan so‘ng ayblanuvchining onasi falaj bo‘lib qolganini qo‘shimcha qildi. «Siz bilmagan ko‘p narsa bor», – deydi u.

O‘zbekiston fuqarosiga zarur konsullik-huquqiy yordam ko‘rsatilayotgani va unga advokat biriktirilgani qayd etildi. Holat Bosh konsulxona tomonidan nazoratga olingan.