Xitoy o‘z fuqarolarining Rossiya tomonida turib Ukrainadagi urushda ishtirok etayotganini rad etdi

Xitoy doim o‘z fuqarolarini qurolli mojarolardan «uzoqroq turishga» chaqiradi. Bu haqda XXR Tashqi ishlar vazirligi rasmiy vakili Lin Tszyan brifingda jurnalistning Ukraina armiyasi tomonidan xitoylik harbiylar asirga olingani haqida bergan savoliga javoban ma’lum qildi.

«Xitoy Ukraina tomoni bilan ma’lumotni tekshirmoqda. Xitoy tomoni fuqarolarni doim mojaro zonasidan uzoqroq turishga, har qanday shakldagi qurolli mojarodan, jumladan, harbiy operatsiyalarda ishtirok etishdan qochishga chaqirishini ta’kidlab o‘tmoqchiman», — deydi Lin Szyan.

Kuni kecha Volodimir Zelenskiy Ukraina Qurolli kuchlari Rossiya armiyasi tomonida turib jang qilgan ikki nafar Xitoy fuqarosini asirga olganini ma’lum qilgandi. Uning so‘zlariga ko‘ra, bu Donetsk oblasti hududida sodir bo‘lgan. Zelenskiy, shuningdek, Kiyevda Rossiya armiyasining boshqa bo‘linmalarida ham Xitoy fuqarolari jang qilayotgani to‘g‘risida ma’lumotlar borligini ta’kidladi. Ukraina prezidenti mamlakat TIV rahbariga «Pekin bilan bog‘lanishni» buyurgan.

Eslatib o‘tamiz, yanvar oyida Ukraina rasmiylari Rossiya tomonida jang qilayotgan Shimoliy Koreyaning ikki fuqarosini qo‘lga olgani to‘g‘risida xabar berilgandi. Ulardan birida Rossiyaning Tuva hududida ro‘yxatdan o‘tgan boshqa shaxs nomiga berilgan harbiy guvohnoma borligi aniqlangan, ikkinchisida esa hech qanday hujjat topilmagan.