O‘zbekistonda Belarus davlat universiteti filiali ochiladi

Muzokaralar chog‘ida Belarus prezidentining 2024 yil 7-9 fevral kunlari O‘zbekistonga amalga oshirgan rasmiy tashrifi davomida maktabgacha va maktab ta’limi sohasida erishilgan ikki tomonlama kelishuvlarni amalga oshirish masalalari ko‘rib chiqildi.

Andrey Ivanets Belarus Ta’lim vazirligi va O‘zbekiston Maktabgacha va maktab ta’limi vazirligi o‘rtasida imzolangan "Yo‘l xaritasi"ni hamda O‘zbekiston Oliy ta’lim, fan va innovatsiyalar vazirligi bilan erishilgan Hamkorlik dasturi bandlarini batafsil muhokama qilishni davom ettirishga tayyorligini bildirdi.

Shuningdek, tomonlar O‘zbekistonda 2024 yil sentabr oyida o‘z faoliyatini boshlashi kerak bo‘lgan P.M.Masherov nomidagi Vitebsk davlat universiteti ta’lim muassasasi filialini ochish bo‘yicha muzokaralar jarayonini davom ettirish va yakunlash taklifini qo‘llab-quvvatladilar.

Birinchi O‘zbekiston-Belarus professional ta’lim forumi yakunlari bo‘yicha mamlakat 14 ta hududida kasb-hunarga o‘qitish markazlarini tashkil etishda uslubiy yordam ko‘rsatish bo‘yicha erishilgan kelishuvlarga to‘xtalar ekan, Andrey Ivanets Belarus tomonida ushbu sohada katta tajriba borligini ta’kidladi va ularning o‘zbek tomoni bilan o‘rtoqlashishga tayyorligini bildirdi.

O‘zbekiston Oliy ta’lim, fan va innovatsiyalar vazirligi Belarusning "EkoTexnoPark-Volma Resurs markazi" tajribasini qo‘llagan holda Buxoro neft va gaz sanoati kolleji negizida energiya samaradorligi va qayta tiklanuvchi energetika sohasidagi vakolatlar markazini tashkil etish masalasi ustida ishlayapti. Ushbu birinchi pilot markaz joriy yilda ochilishi rejalashtirilgan.

Muzokaralar chog‘ida, shuningdek, O‘zbekistonda talab yuqori bo‘lgan yo‘nalishlarda "2+2" shaklidagi qo‘shma ta’lim dasturlarini amalga oshirish istiqbollari xususida ham fikr almashildi.