Apple boj joriy qilinishidan oldin AQShga beshta samolyotda iPhone keltirdi

Apple kompaniyasi mart oyi oxirida uch kun ichida Hindistondan AQShga beshta samolyotda iPhone va boshqa gadjetlarni keltirgani ma’lum bo‘ldi. Shu tariqa u bojlar joriy qilinishidan oldin zaxira to‘plashga harakat qilgan. Bu haqda The Times of India gazetasi Hindistonning yuqori martabali davlat amaldoriga tayanib xabar berdi.

Gazeta manbalari, shuningdek, Apple Xitoydan qurilmalarni faol ravishda sotib olgani haqida xabar berdi. «Hindiston, Xitoy va boshqa muhim mintaqalardagi zavodlar yuqori tariflarni kutgan holda AQShga mahsulot jo‘natishdi», dedi ular.

Manbalar ta’kidlaganidek, iPhone va boshqa gadjetlar zaxiralarining ko‘payishi kompaniyaga ma’lum vaqt davomida ularning narxini oshirmaslikka yordam beradi. Rosenblatt Securities investitsiya kompaniyasi hisob-kitoblariga ko‘ra, agar Apple bu xarajatlarni to‘liq xaridorlarga o‘tkazib yuborsa, AQShda iPhone narxlari 43 foizga oshishi mumkin.

Tarif ko‘tarilishidan oldingi so‘nggi oyda Amerika kompaniyalari turli sohalardagi faol xaridlarni amalga oshirdi. Shu sababli, Xeneta xizmati hisob-kitoblariga ko‘ra, so‘nggi haftalarda Xitoydan AQShga shoshilinch havo yuklarini yetkazib berishning o‘rtacha narxi 37 foizga oshgan.