Toshkentda 9 aprelga qadar yuk mashinalari harakati to‘liq cheklanadi

Bu vaqt davomida yuk tashuvchi transport vositalari faqat Toshkent halqa avtomobil yo‘lidan harakatlanishi mumkin.

Toshkent shahrining markaziy ko‘chalarida yuk mashinalari harakati bir necha kunga to‘liq cheklanadi. Bu haqda poytaxt IIBB YHXB axborot xizmati xabar berdi.

2025 yil 4 apreldan 9 aprelga qadar Toshkent shahrida Parlamentlararo ittifoqining 150-yubiley assambleyasi tadbirlari o‘tkazilishi rejalashtirilgan. Shu vaqt ichida poytaxtning markaziy ko‘chalarida yuk transport vositalari harakati to‘liq cheklanadi.

«Qurilish obektlarida og‘ir va yengil vaznli barcha toifadagi yuk tashuvchi transport haydovchilari faqat Toshkent halqa avtomobil yo‘lidan harakatlanishlari mumkinligini ma’lum qilamiz», — deyiladi xabarda.

YHXB vaqtinchalik noqulayliklar uchun uzr so‘rab, haydovchilarga o‘z yo‘llarini oldindan rejalashtirishni tavsiya qildi.

Avvalroq Shayxontohur tumanidagi Shofayzi ko‘chasi 25 martdan 1 mayga qadar yopilgani, Olmazor tumanidagi Qorasaroy ko‘chasida esa 2 apreldan sentabr oyigacha transport vositalari harakati cheklangani to‘g‘risida xabar berilgandi.

#Toshkent #yuk mashinalari #Parlamentlararo ittifoq