Yangi Zelandiyada politsiya xatosi sabab 11 yoshli qiz ruhiy kasalliklar shifoxonasiga joylashtirildi

Yangi Zelandiyada politsiyachilar 11 yoshli qizni ruhiy kasalliklar shifoxonasiga joylashtirdi. U yerda qizga kuchli ta’sir qiluvchi dori vositalari qilingan. Ammo keyinroq qiz shifoxonaga politsiya xodimlarining xatosi sabab tushib qolgani aniqlangan: huquq-tartibot organi xodimlari uni kasalxonadan qochib ketgan 20 yoshli bemor deb o‘ylagan. Bu haqda The Guardian xabar bermoqda.

Gazeta ma’lumotlariga ko‘ra, mazkur holat siyosiy yetakchilarni «dahshatga» solgan va mamlakat aholisining g‘azabiga sabab bo‘lgan. Ta’kidlanishicha, «nutqida kamchiliklar mavjud» qiz G‘arbiy Hamiltonning shimoliy qismidagi ko‘prikdan o‘tib ketayotganida politsiya mashinasiga duch kelgan. Huquqni muhofaza qilish organlari xodimlari qizni shifoxonaga olib borgan va u yerda qiz «intensiv psixiatrik terapiya bo‘limiga» joylashtirilgan. Shifoxonadagi hamshira darhol shubhaga borgan va bemor «yosh bolaga o‘xshashini» bildirgan.

Sog‘liqni saqlash vazirligi ma’lumotlariga ko‘ra, imkoniyati cheklangan qiz shifoxona xodimlariga o‘zi haqida gapirib bera olmagan. Shundan keyin u dori ichishdan bosh tortgan va unga majburan kuchli ta’sir qiluvchi dorilar yuborilgan.

Politsiya o‘z xatosini oradan 12 soat o‘tgach tushunib yetgan. Bu vaqt davomida qiz shifoxonada yotgan. Keyinroq uni oila a’zolari olib ketgan.

Yangi Zelandiya hukumati holat bo‘yicha tergov o‘tkazishni va’da qildi.