Samarqandda xalqaro sammit oldidan elektr ta’minoti tizimi qayta ta’mirlandi

Ushbu nufuzli tadbirlarga tayyorgarlik doirasida shaharning elektr ta’minoti yanada takomillashtirildi. “Hududiy elektr tarmoqlari” AJ va uning Samarqand filiali tomonidan tegishli chora-tadbirlar amalga oshirildi.

Jumladan, sammit o‘tkaziladigan obektlarni uzluksiz elektr energiyasi bilan ta’minlash maqsadida 14 ta podstansiya, 5 ta taqsimlash tarmog‘i, 64 ta transformator punktlari hamda 525 km elektr uzatish tarmoqlari texnik ko‘rikdan o‘tkazildi. Shuningdek, 35-110 kV kuchlanishdagi bir nechta havo elektr uzatish tarmoqlari ham tekshirilib, aniqlangan kamchiliklar bartaraf etildi.

“Registon” podstansiyasidan chiquvchi yirik elektr tarmoqlarida qo‘shimcha modernizatsiya ishlari olib borildi. Shuningdek, shaharning tarixiy obidalari va ziyoratgohlarini elektr bilan ta’minlaydigan 16 ta transformator punktlari tekshirilib, uchtasida yangi elektr qurilmalari o‘rnatildi.

Sammit doirasida elektr ta’minotiga bo‘lgan ehtiyojni qoplash maqsadida Samarqandga 10 ta “Damas” avtomashinasi, 3 ta ISUZU maxsus texnikasi hamda zamonaviy UPS qurilmalari yetkazib berildi.

Shuningdek, 8 ta tezkor xizmat ko‘rsatish brigadasi tashkil etilib, ular zarur texnik vositalar va materiallar bilan ta’minlandi. Qo‘shimcha ravishda 7 ta mobil dizel elektr stansiyasi (DES) va 12 ta UPS qurilmasi tarmoqqa ulandi.

Tadbir davomida elektr ta’minoti uzluksizligini ta’minlash maqsadida mutaxassislar 24 soatlik navbatchilikda bo‘ladi.