Shimoliy Karolinada o‘rmon yong‘inlari kuzatilmoqda

Quruq ob-havo hamda kuchli shamol oqibatida o‘tgan dam olish kunlari Shimoliy Karolina shtatida ikki o‘rmon yong‘ini jami 4 ming akr (1,6 ming gektar) maydonga yoyildi, deb xabar beradi The New York Times.

Qayd etilishicha shtatning ba’zi okruglarida Jamoat xavfsizligi boshqarmalari ixtiyoriy evakuatsiya e’lon qilgan. Mahalliy hokimiyat aholini yong‘in tutuni sababli yo‘llarda ko‘ruvchanlik cheklangan haqida ogohlantirib, haydovchilardan yanada ehtiyotkor bo‘lishni so‘ramoqda.

Yong‘inga qarshi Shimoliy Karolina va boshqa shtatlardan kelgan 250 ga yaqin o‘t o‘chiruvchi kurashyapti. Eng murakkab vaziyat shtat g‘arbida joylashgan Polk okrugida kuzatilmoqda. U yerda 20 mingga yaqin odam yashaydi, shtat rasmiylari ushbu okrugda alanganing tarqalishi sabab «qizil» xavf darajasini e’lon qilgan.

Mahalliy o‘rmon xo‘jaligi boshqarmasi allaqachon shtatdagi barcha o‘rmonlarda gulxan yoqishga to‘liq taqiq joriy etgan. «Bizning asosiy vazifamiz – aholi hayoti va sog‘lig‘ini, xususiy, shtat va federal mulklarni hamda o‘rmon massivlarini himoya qilishdir», — deyiladi xabarda.

Eslatib o‘tamiz, yanvar boshlarida Los-Anjyeles okrugida yong‘inlar boshlangan edi. Ushbu yong‘inlar oqibatida kamida 28 kishi halok bo‘lgan, 16 mingga yaqin inshoot yonib ketgan yoki shikastlangan, 180 ming kishi evakuatsiya qilingandi. Yong‘inlar yetkazgan zarar 250 milliard dollarga baholangan.