HAMASning yuqori martabali a’zosi Isroil aviazarbasi oqibatida o‘ldirildi

HAMAS siyosiy byurosi a’zosi va falastinlik deputat Saloh al-Bardavil 23 mart kuni Isroil tomonidan G‘azo sektori janubidagi Xon-Yunusga uyushtirilgan hujum oqibatida rafiqasi bilan halok bo‘ldi, deb xabar beradi Reuters. Ularning jasadi Naser shifoxonasi morgiga yetkazilgan.

HAMAS bayonotiga ko‘ra, Bardavil «Al-Mavosi hududidagi chodirida kechki ibodat qilayotgan vaqtda amalga oshirilgan zarba» natijasida o‘ldirilgan.

HAMAS buni «qo‘rqoq tsionistik hujum» deb atab, Isroilni G‘azo sektorida «ommaviy qirg‘in uyushtirish doirasida harbiy jinoyatlar sodir etishda» aybladi.

Undan ikki kun oldin TSAHAL uyushtirgan hujum oqibatida HAMAS harbiy razvedkasi boshlig‘i Usama Tabash o‘ldirilgan edi. Ushbu operatsiya Isroilning «Shabak» maxsus xizmati bilan hamkorlikda o‘tkazilgan.

19 yanvardan beri Isroil va HAMAS o‘rtasida o‘t ochishni to‘xtatish rejimi amalda edi. Ammo oradan ikki oy o‘tib, 18 mart kuni jangovar harakatlar qayta tiklandi. Isroil Mudofaa armiyasi (TSAHAL) HAMAS obektlariga hujumlarni amalga oshirishni boshladi.

Isroil bosh vaziri va mudofaa vaziri Tel-Avivning mazkur qarorini «HAMAS bir necha bor garovdagi isroilliklarni ozod etishdan bosh tortgani va barcha takliflarni rad etgani» bilan izohladi. Isroil hukumati hozirgi harbiy operatsiya kengaytirilishini ma’lum qildi. O‘z navbatida HAMAS ham bunga javob hujumlarini uyushtirmoqda, xususan, 20 mart kuni guruh Tel-Avivga raketalar uchirdi.

Eslatib o‘tamiz, o‘tgan yili HAMASning bir qator yetakchilari va qo‘mondonlari Isroilga qarshi janglarda halok bo‘lgandi — ular orasida avgust oyida o‘ldirilgan HAMAS siyosiy byurosi rahbari Isroil Haniya ham bor. Oktyabrda esa Isroil mudofaa kuchlari Haniya o‘rniga tayinlangan HAMAS yetakchisi Yahyo Sinvar G‘azoda o‘ldirilganini tasdiqlagan edi.