Erdo‘g‘an ofisi Istanbul merining hisbga olinishiga izoh berdi

Turkiya prezidentining matbuot xizmati rahbari Faxriddin Altun Istanbul meri Akrom Imomo‘g‘lining hibsga olinishiga izoh berdi.

«Mustaqil sud hokimiyati tomonidan qabul qilingan har qanday qarorni jamoatchilikning barcha qatlami hurmat qilishi kerak», — deb yozadi Altun X ijtimoiy tarmog‘idagi sahifasiga.

«Istanbul Bosh prokuraturasi tomonidan o‘tkazilgan tergovlar doirasida shahar meri idorasi mansabdorlari va boshqa gumonlanuvchilarni hibsga olish to‘g‘risidagi qaror qabul qilingandan so‘ng ayrim doiralar, ayniqsa, asosiy muxolifat partiyalari rahbarlari, siyosiy va mafkuraviy sabablar bilan tergovning yaxlitligini izdan chiqarishga urinayotganini ko‘ryapmiz. Biz turk millati nomidan o‘z vakolatlarini amalga oshirayotgan sud organlarimizning mustaqilligini izdan chiqarishga qaratilgan bunday urinishlarga qat’iy qarshilik ko‘rsatishda davom etamiz», — deydi prezident matbuot kotibi.

Shuningdek, ta’kidlanishicha, prezident idorasi «boshlangan tergovning mazmuni va tafsilotlari bilan tanishmasdan turib, siyosiy va mafkuraviy baholarga asoslangan tuhmat xarakteridagi ayblovlar ilgari surilayotganini» qayd etib bormoqda.

Bugun, 19 mart kuni Turkiya politsiyasi Istanbul shahri meri Akrom Imomo‘g‘lini hibsga oldi. Shahar hokimidan tashqari uning matbuot kotibi, shuningdek, shahar ma’muriyatining yana 100 ga yaqin xodimi hibsga olingan.

2019 yildan buyon Istanbul shahri meri hisoblangan siyosatchi hibsga olinishi fonida shaharda bir nechta yo‘l yopildi va to‘rt kun davomida har qanday namoyishlar o‘tkazish taqiqlandi. Shuningdek, NetBlocks monitoring xizmati xabar berishicha, Turkiyada X ijtimoiy tarmog‘i (sobiq Twitter), YouTube, Instagram va TikTok’ga kirish cheklangan.