Ilon Mask ukrainalik 10 nafar oligarxga qarshi sanksiyalar joriy etish taklifini berdi

Milliarder va AQSh Hukumat samaradorligi departamenti (DOGE) boshlig‘i Ilon Mask ukrainalik o‘n nafar oligarxga qarshi sanksiyalar joriy etish taklifini ilgari surdi. Biznesmen aynan kimlarga qarshi cheklovlar joriy etish kerakligiga oydinlik kiritmagan.

«O‘n nafar ukrainalik oligarxga qarshi sanksiyalar joriy eting, ayniqsa, Monakoda koshonalari borlarga qarshi va bu zudlik bilan to‘xtaydi. Jumboqning kaliti shu», — deb yozadi Mask. Bu haqda u Oq uy oldida yoyilgan ulkan Ukraina bayrog‘i videosi muallifining postiga javoban yozib qoldirdi. Shuningdek, Mask ushbu aksiyani kim moliyalashtirgani va u qanchaga tushgani to‘g‘risidagi savolni o‘rtaga tashladi.

Bundan tashqari, Ilon Mask Starlink sun’iy yo‘ldosh internet tizimi — bu «Ukraina armiyasining tayanchi» ekanini ma’lum qildi. Uning so‘zlariga ko‘ra, tizimning o‘chirib qo‘yilishi front chizig‘ida Ukraina Qurolli kuchlarining halokatiga olib keladi. Ukraina bo‘linmalari jangovar harakatlar amalga oshiriladigan hududlar bilan aloqani ta’minlashda Starlink’dan foydalanmoqda.

2021 yilda AQSh ukrainalik biznesmen Igor Kolomoyskiy hamda uning oilasiga qarshi sanksiyalar qo‘llagan. Tadbirkor Dnepropetrovsk oblasti gubernatori lavozimida o‘tirganida korrupsiyaga yo‘l qo‘yganlikda ayblangan. 2025 yil fevralda Odessa meri Gennadiy Truxanovga nisbatan ham sanksiyalar qo‘llash imkoniyati ko‘rib chiqilayotgani ma’lum bo‘lgandi. Amerika tomonining hisoblashicha, merning Odessadagi jinoiy guruhlarga aloqadorligi bor, shuningdek, to‘rtta ofshor kompaniyaning katta miqdordagi aksiyalariga egalik qiladi.