Ruminiyada davlat to‘ntarishiga urinishda gumonlangan shaxslar ushlandi. Ish figurantlaridan biri - 101 yoshli general

Hibsga olingan shaxslar «Ruminiya va Rossiya hududlarida bo‘lgan chet el hukumatlarining agentlari bilan bir necha bor aloqaga kirishgan». Ular mamlakatdagi konstitutsiyaviy tuzumni o‘zgartirishni rejalashtirgan.

Foto: Getty images

Ruminiyada hokimiyatni to‘ntarishga uringanlikda gumonlanib olti kishi hibsga olindi. Bu haqda Uyushgan jinoyatchilik va terrorizmga qarshi tergov boshqarmasi ma’lum qildi.

Ruminiya tergovi versiyasiga ko‘ra, 2023 yilda olti nafar gumonlanuvchining besh nafari mamlakat «suvereniteti va mustaqilligiga putur yetkazish maqsadida» uyushgan jinoiy guruh tuzgan — ular «mamlakat mudofaa qobiliyatini zaiflashtirishni» rejalashtirgan. Keyingi yilda gumonlanuvchilar safiga yana bir kishi qo‘shilgan.

Tergovning hisoblashicha, gumonlanuvchilar «Ruminiya va Rossiya hududlarida bo‘lgan chet el hukumatlarining agentlari bilan bir necha bor aloqaga kirishgan». Guruh tarkibida bir nafar general-mayor ham bo‘lgan. Uning va boshqa gumonlanuvchilar ismi oshkor etilmagan.

Jinoiy guruh a’zolari o‘z tarafdorlarini og‘dirib olish bilan shug‘ullangan va internetda turli videolarni e’lon qilib kelgan — masalan, Ruminiya hukumatiga, milliy va xalqaro tashkilotlarga murojaatlar. Bundan tashqari, gumonlanuvchilar Ruminiyaning NATOdan chiqishi, konstitutsiyaviy tuzumni almashtirish, partiyalarni tarqatib yuborish, yangi hukumat o‘rnatish, mamlakat nomi, bayroq va madhiyasini o‘zgartirish bo‘yicha «tashqi kuchlar» bilan muzokaralar olib borgan.

Ta’kidlanishicha, gumonlanuvchilarning ikki nafari 2025 yil yanvar oyida Moskvaga borib, «tashkilotning Ruminiyada davlat hokimiyatini qo‘lga kiritish bo‘yicha harakatlarini qo‘llab-quvvatlashga tayyor» odamlar bilan aloqada bo‘lgan.

«Ozodlik radiosi»ning Ruminiya xizmati manbasiga ko‘ra, ish figurantlaridan biri — 101 yoshli iste’fodagi general Radu Teodorudir. U hibsga olinmagan, ammo 5 martda uning uyiga tergovchilar kelgan.

5 mart kuni Ruminiya TIV mamlakatdagi Rossiya harbiy attashesi va uning yordamchisini «persona non grata» deb e’lon qilgandi. Bunga ularning harakatlari «1961 yilgi Diplomatik munosabatlar to‘g‘risidagi Vena konvensiyasi qoidalariga mos kelmasligi» sabab qilib ko‘rsatilgan.

#Ruminiya #davlat to‘ntarishi