Abduqodir Husanov – «Manchester Siti»ning fevral oyidagi eng yaxshi o‘yinchisi deb e’lon qilindi

«Manchester Siti» klubi matbuot xizmati fevral oyi yakunlariga ko‘ra, oyning eng yaxshi futbolchisi nomi uchun so‘rovnoma o‘tkazdi. Quvonarlisi, nomzodlar ro‘yxatiga Abduqodir Husanov ham kiritilgan edi va o‘zbekistonlik himoyachi «Siti»dagi ilk oyidayoq jamoa hujumchisi Erling Holand va chap qanot himoyachisi Yoshko Gvardiol bilan oy laureati sovrini uchun kurashdi.

Bir hafta davomida o‘tkazilgan ovoz berish yakunlariga binoan, Abduqodir Husanov – «Manchester Siti»ning fevral oyidagi eng yaxshi o‘yinchisi deb topildi. Qayd etish joiz, 21 yoshli himoyachining so‘rovnomada g‘olib bo‘lishida o‘zbekistonlik muxlislarning ovoz berish jarayonida faol bo‘lgani muhim ahamiyat kasb etdi.

Ma’lumot uchun, Husanov «Siti» safida fevral oyida APL doirasida 4ta, YeChLda bitta, Angliya kubogi doirasida esa bitta o‘yin o‘tkazib, 1ta golga mualliflik qildi.

Avvalroq, O‘zbekiston milliy jamoasi hujumchisi Eldor Shomurodov ham «Roma»dagi 4 yillik faoliyati davomida ilk bor Rim klubining fevral oyidagi eng yaxshi o‘yinchisi deb topilgandi.