Isroil 600 dan ortiq falastinlik mahbuslarning ozod etilishini bekor qildi

Isroil bosh vaziri Binyamin Netanyahu 23 fevral kuni HAMAS guruhi garovdagi isroilliklardan «tahqirlovchi marosimlar»da foydalanayotgani uchun 602 nafar falastinlikning ozod etilishi to‘xtatilganini e’lon qildi, deb yozadi The Times of Israel.

«HAMAS tomonidan kelishuvning bir necha bor buzilishi, jumladan, garovdagi fuqarolarimizning qadr-qimmatini kamsituvchi marosimlar va ulardan propaganda maqsadlarida foydalanilayotgani uchun 22 fevral kuniga rejalashtirilgan mahbuslarning ozod etilishi kechiktirildi», — deydi Isroil bosh vaziri.

Netanyahu bu kabi bayonot bilan 600 nafardan ortiq falastinlik Oferdagi qamoqxonani tark etish uchun avtobuslarga o‘tirganidan keyin chiqish qildi. Keyinroq ularga ozod etilish jarayoni noma’lum muddatga kechiktirilgani aytilgan.

Falastin milliy ma’muriyati vakillari mahbuslar ozod etilishi kechiktirilganini tasdiqladi. HAMAS Isroilni o‘t ochishni to‘xtatish bitimini buzishda aybladi.

HAMAS 22 fevral kuni besh nafar isroillikni G‘azo sektoridagi marosim davomida ozod etdi. Isroil fuqarolari harbiy bo‘lmasa-da, ularga armiya formasi kiydirilgandi. Shuningdek, shanba kuni ozod etilganlar qurollangan HAMAS a’zolari tomonidan olomon oldida kuzatib borilgan — bu kartina BMT va Qizil Xoch tomonidan shafqatsiz deb tanqid qilindi.

HAMAS Isroil bilan tinchlik kelishuvining birinchi bosqichi doirasida garovga olingan 33 nafar isroillikning barchasini ozod etdi. Isroil va HAMAS o‘rtasida o‘t ochishni to‘xtatish kelishuvi yanvar oyidan beri amal qiladi. Kelishuvning birinchi bosqichida Isroil 1900 nafardan ortiq falastinlik mahbuslarni qamoqxonadan ozod qilish majburiyatini olgan edi.