Rossiyada qiyin ahvolda qolgan oila O‘zbekistonga qaytarildi

O‘zbekiston Bosh konsulxonasi ko‘magida Rossiyaning Sverdlovsk oblastida og‘ir hayotiy vaziyatga tushib qolgan vatandoshlardan iborat oila yurtimizga qaytarildi.

Foto: "Dunyo" AA

Bosh konsulxonadan olingan ma’lumotga ko‘ra, joriy yil 18 yanvar kuni O‘zbekiston fuqarosi M.Z. oilasi og‘ir moliyaviy ahvolda qolgani sababli yordam berishni so‘rab murojaat qilgan.

Ma’lum bo‘lishicha, M.Z. va uning 2016, 2018 va 2024 yilda tug‘ilgan farzandlari oila boshlig‘i tomonidan vaqtincha mehnat faoliyatini amalga oshirish uchun Rossiyaning Sverdlovsk oblastiga olib kelingan.

Surishtiruvlar natijasida M.Z.ning turmush o‘rtog‘i B.X. 6 yanvar kuni ro‘yxatdan o‘tmasdan ishlayotgani sababli Sverdlovsk oblasti huquq tartibot idoralari tomonidan o‘tkazilgan reyd tadbiri davomida qo‘lga olingani va Yekaterinburg IIB qoshidagi XFVSMga joylashtirilgani aniqlandi.

Diplomatlar XFVSMda bo‘lib, B.X.ning holidan xabar olishdi. B.X. ma’muriy javobgarlikka tortilganidan so‘ng qo‘yib yuborildi. Shunday bo‘lsa-da, oila qiyin ahvolda qolayotgani sabab O‘zbekistonga qaytishini bildirgan.

Bosh konsulxona tomonidan ushbu murojaat ijobiy hal etilib, M.Z. va uning 3 nafar voyaga yetmagan farzandlariga Yekaterinburg-Toshkent aviareysi orqali O‘zbekistonga qaytish uchun chipta xarid qilindi.

Mazkur oila Yekaterinburg shahridagi "Kolsovo" xalqaro aeroportidan Bosh konsulxona xodimlari ishtirokida Toshkent shahriga kuzatib qo‘yildi.

#Sverdlovsk #oila