Odessaga raketa zarbasi: kamida yetti kishi jarohatlandi

31 yanvar, juma kuni Rossiya qo‘shinlari Odessaning tarixiy markaziga raketa hujumi uyushtirganini Ukraina prezidenti Volodimir Zelenskiy tasdiqladi. Dastlabki ma’lumotlarga ko‘ra, havo hujumiga qarshi mudofaa tizimlari tomonidan to‘xtatilishi qiyin bo‘lgan «Iskandar» tipidagi ballistik raketalardan foydalangan.

Otishma natijasida yetti kishi jarohat oldi, ularning hammasining ahvoli o‘rtacha og‘ir, dedi Odessa oblasti harbiy ma’muriyati rahbari Oleg Kiper. Zelenskiy hujum markazida norvegiyalik diplomatlar bo‘lganini aytdi. Ulardan biror kishi jarohat olgani yoki yo‘qligi hozircha noma’lum.

Odessaga berilgan zarbalar fonida Ukraina prezidenti mamlakat havo mudofaasini yanada kuchaytirishga chaqirdi: «Qayta va qayta: havo hujumidan mudofaa birinchi o‘rinda, biz barcha hamkorlar bilan davlatimizni yanada ko‘proq himoya qilish uchun ishlayapmiz».

Tarixiy mehmonxona binosi shikastlangan

"Dumskaya" nashrining aniqlik kiritishicha, hujum 19-asr oxirida qurilgan Italyanskaya ko‘chasidagi "Bristol" mehmonxonasi binosiga qilingan. Mehmonxona tomida yong‘in kelib chiqqan va yong‘inni o‘chirish uchun 23 kishi safarbar etilgan. Bundan tashqari, adabiy, tarixiy, o‘lkashunoslik va arxeologiya muzeylari, G‘arb va sharq san’ati muzeyi, filarmoniya fasadlari shikastlangan. 

«Bu yerda betonni yorib o‘ta oladigan raketa ishlatilgan», — deya "Dumskaya" Odessa OHM rahbari Oleg Kiperdan iqtibos keltiradi.

Nashrning qo‘shimcha qilishicha, Kiyev rayonida shaharni o‘qqa tutish vaqtida noma’lum shaxslar feyyerverk otishgan. Ularning shaxsi aniqlanmoqda.

Rossiya Odessaning o‘qqa tutilishi haqida hech qanday bayonot bermadi.