Ukrainaning Slovakiyadagi elchisiga norozilik notasi topshirildi

29 yanvar, chorshanba kuni Ukrainaning Slovakiyadagi elchisi Miroslav Kastran Bratislavadagi Tashqi ishlar vazirligiga chaqirilib, unga norozilik notasi topshirildi. Bunga «Slovakiya Respublikasining ichki ishlariga aralashish» sifatida baholangan «Ukraina tomonining bayonotlari» sabab bo‘ldi, deb xabar beradi dpa agentligi. 

Hujjat matnida Slovakiya TIV kimning va qaysi bayonotini nomaqbul deb topgani ko‘rsatilmagan. Bir kun avval Kiyevdagi Tashqi ishlar vazirligi o‘zining rasmiy veb-saytidagi bayonotida Slovakiya bosh vaziri Robert Fitsoni tanqid qilgan, Ukraina prezidenti Volodimir Zelenskiy esa Fitso mamlakat suvereniteti evaziga «Moskvani tanlayotganini» aytgandi.

Slovakiyada hukumatga qarshi ommaviy namoyishlar bo‘lib o‘tdi

24 yanvar kuni Slovakiyada o‘n minglab odamlar mamlakat hukumati siyosatiga qarshi norozilik bildirish uchun ko‘chalarga chiqdi. Dpa axborot agentligining xabar berishicha, namoyishchilar bosh vazir Robert Fitsoning iste’fosini talab qilishgan. Tashkilotchilarga ko‘ra, o‘sha kuni eng katta maydonga — Bratislavadagi Slovakiya hukumati qarorgohi oldida — 60 mingga yaqin odam to‘plangan.

Boshqalar qatorida Mier Ukrajine («Ukrainaga tinchlik») tashkiloti norozilik namoyishlariga chaqirdi. Uning vakili Marian Kulich jurnalistlarga tushuntirganidek, tarafdorlari Rossiyaga nisbatan «hamkorlikka» qarshi. «Slovakiya Yevropaning bir qismidir», dedi u. Ayni paytda, dpa muxbirlarining ta’kidlashicha, avvalgi shunga o‘xshash harakatlardan farqli o‘laroq, 24 yanvar kuni Ukraina bayroqlari sezilarli darajada kamaygan. Buning o‘rniga namoyishchilar Slovakiya milliy bayroqlari va Yevropa Ittifoqi bayroqlarini olib kelishdi.