Turkiyada 78 kishining o‘limiga olib kelgan mehmonxonadagi yong‘in nima sababdan yuz bergani aniqlandi

Tergov Turkiya shimoli-g‘arbidagi Kartalkaya tog‘-chang‘i kurortida joylashgan mehmonxonada yuz bergan yong‘in nima sababdan kelib chiqqanini aniqladi, deb xabar beradi Sabah gazetasi.

Mas’ul organlarning ma’lumotlariga ko‘ra, yong‘in soat 03:21 da mehmonxona restoranida boshlangan. Bu vaqtda oshxona ishchilari nonushta tayyorlash maqsadida mahsulotlarni gril-plitada qovurayotgan bo‘lgan. Qurilma ustidagi yog‘ uzoq vaqt davomida qizib ketgani bois kutilmaganda alangalangan.

Oshpaz va oshxona ishchilari olovni mustaqil o‘chirishga uringan. Ammo o‘t o‘chirish moslamasidan foydalanish o‘rniga ular alanga ustiga suv sepishga qaror qilgan. Bu esa ovolning yanada tarqalishiga sabab bo‘lgan.

Olov moy izlaridan tozalanmagan havoni tortish va ventilyatsiya tizimi orqali tomga tarqalgan. Natijada alanga butun binoni qamrab olgan. Shunday qilib, Grand Kartal mehmonxonasida sodir bo‘lgan yong‘in oshpazlarning mas’uliyatsizligi oqibatida kelib chiqqan.

Bunga qo‘shimcha ravishda fojia yuz bergan vaqtda mehmonxona o‘t o‘chirish tizimi ishlamayotgan bo‘lgan. Bu esa mehmonlar xavfdan o‘z vaqtida ogohlantirishsiz qolib ketishiga olib kelgan. Vahimaga tushgan oshxona xodimlari yuzaga kelgan yong‘indan mehmonlarni xabarsiz qoldirib, ko‘chaga yugurib chiqqan.

Holat yuzasidan jinoyat ishi qo‘zg‘atilgan bo‘lib, to‘rt nafar oshxona xodimi, oshpaz Feysal Yaver, shuningdek, Yusuf Qoraxonli, Fidan Kurch va Mehmen Gyunduz ismli ishchilar qo‘lga olingan. Ularga nisbatan odamlar o‘limiga olib kelgan mas’uliyatsizlik moddasi bo‘yicha ayblov e’lon qilingan.

21 yanvar kuni boshlangan yong‘in vaqtida ba’zi mehmonlar mehmonxona oynasidan sakragan. Boshqalar esa bog‘langan choyshab va adyol yordamida yerga tushishga harakat qilgan. Yong‘in joyiga o‘nlab o‘t o‘chirish mashinasi va 38 ta tez tibbiy yordam mashinasi jo‘natilan. Mehmonxonaning tog‘ yonbag‘rida joylashgani qutqaruv ishlarini qiyinlashtirgan. Hodisa oqibatida jami 78 kishi halok bo‘lgan.