Putin AZAL samolyoti halokati yuzasidan ikkinchi marta Aliyevga qo‘ng‘iroq qildi

Rossiya prezidenti Vladimir Putin 29 dekabr kuni Ozarboyjon prezidenti Ilhom Aliyev bilan yana telefonda muloqot qildi. Unda davlat rahbarlari Oqtovda Azerbaijan Airlines samolyotining halokati bilan bog‘liq turli masalalarni muhokama qildi. Bu haqda Kreml matbuot kotibi Dmitriy Peskov «Interfaks» nashriga ma’lum qildi. U suhbat tafsilotlarini keltirmadi.

Putin matbuot kotibining bayonoti Ilhom Aliyevning Ozarboyjon televideniyesiga bergan intervyusi fonida paydo bo‘ldi. Unda Aliyev aviahalokatdan keyingi dastlabki kunlarda «Rossiyadan yolg‘ondan boshqa hech narsa eshitmaganini» ta’kidlagan. U, shuningdek, Moskvadan Ozarboyjon samolyotining halokati uchun javobgarlikni tan olish, aybdorlarni jazolashni va tovon to‘lashni talab qildi.

Ozarboyjon prezidenti Ilhom Aliyev matbuot xizmati ham Putinning qo‘ng‘irog‘i haqida xabar berdi. Unda ta’kidlanishicha, davlat rahbarlari Oqtovda Azerbaijan Airlines samolyotining halokati bilan bog‘liq turli masalalarni muhokama qilgan.

Bir kun avval, 28 dekabr kuni ham Putin va Aliyev telefon orqali suhbat qilgan va qo‘ng‘iroq Rossiya tomoni tashabbusi bilan bo‘lgani aytilgan edi.

Kreml xabariga ko‘ra, Putin «fojiali voqea Rossiya havo hududida yuz bergani» uchun Aliyevdan uzr so‘ragan.

Ozarboyjon prezidenti matbuot xizmati xabariga ko‘ra, «Putin AZAL samolyotiga Rossiya havo hududida fizik va texnik ta’sir bo‘lgani uchun uzr so‘radi».