Qonuniy tashqi reklama konstruksiyasi noqonuniy buzilganda biznes-ombudsmanga xabar berish mumkin

Toshkentda tashqi reklama obektlarini demontaj qilish boshlandi. Hokimlik xodimlari shahardagi noqonuniy bannerlar va reklama konstruksiyalarini olib tashlamoqda. 

Tadbirkorlik sub’yektlarining huquqlari va qonuniy manfaatlarini himoya qilish bo‘yicha vakil (biznes-ombudsman) talabga mos reklamalar noqonuniy buzilgan holatlarda bu haqda xabar berishga chaqirdi.

Tashqi reklama obektlarini o‘rnatish tartibi «Reklama to‘g‘risida»gi qonun, Vazirlar Mahkamasining 2020 yildagi «Tashqi reklama bozorini tartibga solish to‘g‘risida»gi 104-sonli qarori va boshqa normativ-huquqiy hujjatlar bilan tartibga solingan.

Hozirda demontaj ishlari 25 oktyabr kuni qabul qilingan tashqi reklama obektlarining dizayn-kodi munosabati bilan amalga oshirilmoqda. 

Agarda tadbirkorlarning qonun talablariga muvofiq o‘rnatilgan tashqi reklama obektlari noqonuniy buzilayotgan holatlar mavjud bo‘lsa, 1100 qisqa raqami orqali biznes-ombudsmanga xabar berish mumkin.