X ijtimoiy tarmog‘i sudyaning tahdidi tufayli Braziliyadagi ofisini yopishini e’lon qildi

Milliarder Ilon Maskka tegishli X ijtimoiy tarmog‘i (sobiq Twitter) Braziliyadagi faoliyatini to‘xtatishini ma’lum qildi. Bu haqda X jamoasining bayonotida so‘z boradi.

X’dagilar qaror majburiy qabul qilingani va kompaniya ushbu holatdan «chuqur qayg‘uda» ekanini bildirdi. Jamoa javobgarlikni Oliy sud sudyasi Aleksandr Morayes zimmasiga yukladi, u «maxfiy farmoyish bilan» ijtimoiy tarmoqning Braziliyadagi qonuniy vakiliga «agar uning senzurali buyrug‘iga bo‘ysunmasa» hibsga olish bilan tahdid qilgan.

«Oliy sudga qilgan ko‘plab murojaatlarimiz ko‘rib chiqilmadi, Braziliya jamoatchiligi ushbu farmoyishlardan xabardor qilinmadi, bizning braziliyalik xodimlarimiz platformamizdagi kontentni blokirovka qilish uchun nazoratga ega emasligiga qaramay, Morayes qonunni hurmat qilish o‘rniga xodimlarimizga tahdid qilishni ma’qul ko‘rdi», — deyiladi bayonotda.

Ular sudyaning xatti-harakatlari «demokratik hukumatga to‘g‘ri kelmasligi» va braziliyaliklarning «tanlovi borligi: demokratiya yoki Aleksandr Morayes» ekanini qo‘shimcha qildi.

Braziliya sudi X’dan ijtimoiy tarmoqda «feyk» tarqatgan ayrim akkauntlarni bloklashni talab qilgan. Ijtimoiy tarmoq avvaliga talabni bajargan, ammo keyin Mask «Braziliyadagi barcha daromaddan ayrilib, u yerdagi ofisini yopishga majbur bo‘lsa ham», akkaunlarni blokdan chiqarishini ma’lum qildi. Morayes sud faoliyatiga to‘sqinlik qilgan milliarderga qarshi tergov boshladi va akkauntlar bloklanmaguncha undan har kuni 20 ming dollar miqdorida jarima undirish bilan tahdid qildi.

Biznesmen sudyani «tajovuzkor senzurada» aybladi. «Bu sudya surbetlarcha bir necha bor Konsitutsiya va Braziliya xalqini sotdi. U iste’fo berishi yoki impichment orqali lavozimdan olinishi kerak», — deb yozadi Mask X’dagi sahifasiga.

Sudya Morayes davlat to‘natishiga aloqadorlikda ayblangan mamlakatning sobiq prezidenti Jair Bolsonaruga nisbatan tergovga boshchilik qilgani bilan tanilgan. Unga 2030 yilga qadar prezident sifatida saylanish taqiqlangan.