Qoraqalpog‘istonning ikki tumanida yangi hokimlar ish boshladi

7 avgust kuni xalq deputatlari Taxiatosh tumani kengashining navbatdan tashqari 80-sessiyasi bo‘lib o‘tdi. Unda Kamiljan Kurbanbayevich Aytbayev hududning yangi hokimi etib tayinlandi.

Aytbayev faoliyati davomida Qoraqalpog‘iston Respublikasi tashqi iqtisodiy aloqalar va savdo vaziri o‘rinbosari vazifasini bajaruvchi, Xo‘jayli tumani hokimining iqtisodiyot va tadbirkorlik masalalari bo‘yicha birinchi o‘rinbosari, Qoraqalpog‘iston Respublikasi Vazirlar Kengashi raisining ishlab chiqarishni mahalliylashtirish va sanoatda kooperatsiya aloqalarini kengaytirish masalalari bo‘yicha yordamchisi lavozimlarida ishlagan.

Bunga qadar u Amudaryo tumani hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari — iqtisodiy taraqqiyot va kambag‘allikni qisqartirish bo‘limi boshlig‘i lavozimida faoliyat olib borayotgandi.

Shu kuni Qoraqalpog‘iston Respublikasi Qorao‘zak tumaniga Anvar Maxsetovich Baymuratov hokim etib tayinlandi.

Baymuratov 1983 yil 11 iyulda Nukus shahrida tug‘ilgan.

2020 yildan bugunga qadar Qorao‘zak tumani hokimining o‘rinbosari — investitsiyalar va tashqi savdo bo‘limi boshlig‘i lavozimida ishlab kelayotgandi.

U, shuningdek, Savdo-sanoat palatasi Qoraqalpog‘iston Respublikasi boshqarmasi, Qoraqalpog‘iston Xususiylashtirilgan korxonalarga kumaklashish va raqobatni rivojlantirish qo‘mitasi, Qoraqalpog‘iston Investitsiyalar va tashqi savdo vazirligida ma’suliyatli lavozimlarda faoliyat olib borgan.

Qoraqalpog‘istonning Taxiatosh tumaniga 2023 yil aprelidan buyon Daniyar Kurbanov, Qorao‘zak tumaniga 2020 yil noyabridan buyon Uzaqbergen Utambetov rahbarlik qilib kelayotgandi. Ularning ikkisi ham 2024 yil iyulida prezident raisligidagi videoselektorda ishdan olingandi.