Sirdaryoda tadbirkordan 4 ming dollar olgan soliq xodimiga hukm o‘qildi

Sirdaryo viloyati Soliq boshqarmasining bosh inspektori 2 yil 3 oy muddatga ozodlikdan mahrum etildi. U kompaniyalarning soliq qarzlarini bankrot deb topish yo‘li bilan bartaraf qilib berish evaziga 4 ming dollar olayotganida ushlangandi.

Foto: MY5

Aprel oyida Sirdaryo viloyati Soliq boshqarmasining bo‘lim bosh inspektori 4 ming dollar olgan vaqtida ushlangani haqida xabar berilgandi. Oliy sud matbuot xizmatining ma’lum qilishicha, unga nisbatan sud hukmi o‘qildi.

Boshqarmaning soliq to‘lovchilarga xizmat ko‘rsatish bo‘limi bosh inspektori Guliston shahridagi 3 ta MChJga tegishli soliq qarzlarini ularni soddalashtirilgan tartibda bankrot deb topish yo‘li bilan bartaraf qilib berishini aytgan.

Buning uchun 5 ming dollar so‘ragan, shundan 4 mingini olayotganida ushlangan.

Holat yuzasidan sud ishi jinoyat ishlari bo‘yicha Guliston shahri sudida ko‘rib chiqilgan. Hukmga ko‘ra, xodim Jinoyat kodeksining 168-moddasi 3-qismi «v» bandi (Xizmat mavqeyidan foydalangan holda firibgarlik), 211-moddasi 1-qismi (Pora berish) orqali aybdor deb topildi.

Unga nisbatan soliq idoralarida har qanday lavozimlarda ishlash huquqidan mahrum etgan holda 2 yil 3 oy muddatga ozodlikdan mahrum qilish jazosi tayinlandi.

#pora #Sirdaryo viloyati #firibgarlik #soliqchi