Ko‘kdala tumani hokimi o‘rinbosari pora bilan ushlandi. U oldin ham sudlangan
Turli hududlarda hokim o‘rinbosari, Transport boshqarmasi boshlig‘i, MIB xodimi va boshqalarning noqonuniy harakatlariga chek qo‘yildi.

Foto: Videodan kadr
Qashqadaryo viloyati Ko‘kdala tumani hokimining o‘rinbosari plyonka mahsulotlari ishlab chiqarishga ixtisoslashgan xususiy korxonani «Har bir oila – tadbirkor» dasturi doirasida mahalliy dehqonlarga plyonka yetkazib beruvchi ta’minotchi korxona sifatida tayinlash evaziga 5 ming AQSh dollari talab qilgan.
U so‘ralgan pul hisobidan 15 mln so‘m olgan vaqtida Davlat xavfsizlik xizmati va Bosh prokuratura huzuridagi Departament xodimlari tomonidan ashyoviy dalillar bilan ushlandi (video).
Tergovga qadar tekshiruv davomida hokim o‘rinbosari o‘zining qo‘shtirnoq ichidagi xolis yordami evaziga avval 10 mln so‘m olgani ham ma’lum bo‘ldi.
U muqaddam JK 167-moddasi (o‘zlashtirish yoki rastrata yo‘li bilan talon-toroj qilish) bilan sudlangan bo‘lsa-da, o‘z xatosidan to‘g‘ri xulosa chiqarmagan.
Andijon shahrida kuzatilgan holatda yo‘lovchi tashish faoliyati bilan shug‘ullanuvchi MChJ rahbari mahalliy fuqaro ishonchiga kirib, o‘z mansabdor tanishlari orqali uning nomiga mas’uliyati cheklangan jamiyat tashkil etib, «Eski shahar – Oltinko‘l» yo‘nalishida yo‘lovchi tashish bo‘yicha aholiga pullik xizmat ko‘rsatish uchun o‘tkazilishi rejalashtirilgan tenderda g‘oliblikni qo‘lga kiritib berish evaziga 7500 AQSh dollari talab qiladi.
DXX va IJQKD xodimlari hamkorligida o‘tkazilgan tezkor tadbirda u so‘ralgan pul mablag‘ini olgan vaqtida ushlandi.
Tergovga qadar tekshiruv davomida Andijon viloyati transport boshqarmasi boshlig‘i vazifasini vaqtincha bajaruvchi mansabdor shaxsning ushbu noqonuniy ishga aloqadorligi aniqlanib, u ham protsessual tartibda ushlandi. Mazkur shaxs ham muqaddam sudlangani ma’lum bo‘lgan.
Majburiy ijro byurosining Toshkent shahar boshqarmasi katta inspektori Byuroning markaziy apparati ish yurituvidagi parrandachilik korxonasi hisobidan aksiyadorlik tijorat banki foydasiga jami 11 mln 108 ming 629 AQSh dollari va 265 ming 187 yevro miqdoridagi qarzdorlikni undirish to‘g‘risidagi ijro ishi yuzasidan, korxonaga tegishli ko‘chmas mulklarni baholash ishlari uchun belgilangan xizmat haqini turli vajlar bilan baholash firmasi foydasiga oshirilgan narxda ko‘rsatib, bank tomonidan baholash firmasi hisobiga o‘tkazilgan ortiqcha pul mablag‘idan o‘zining ulushi sifatida 2500 AQSh dollari olgan vaqtida DXX xodimlari tomonidan ushlandi.
Farg‘ona viloyatida kuzatilgan holatda Yozyovon tumani hokimligi qoshidagi «Xo‘jalik hisobidagi uy-joylarni ro‘yxatga olish, almashtirish va taqsimlash» bo‘limi boshlig‘i o‘z vakolatli tanishlari orqali mahalliy fuqaroning yashash xonadoni uchun order va kadastr hujjatlarini tayyorlab berish evaziga 2500 AQSh dollari olgan vaqtida DXX hamda IJQKD xodimlari tomonidan ushlandi.
Hozirda mazkur shaxslarning barchasiga nisbatan jinoyat ishlari qo‘zg‘atilib, qamoq ehtiyot chorasi qo‘llangan.
Tavsiya etamiz
Yana yuzlab odam aldangan: Alfa va Baraka avtolizing sudidan reportaj
Jamiyat | 11:25 / 18.06.2025
Isroil eronliklar tuzumga qarshi isyon ko‘tarishiga umid qilmoqda. Buning ehtimoli bormi?
Jahon | 20:00 / 17.06.2025
Hozirda sirtqi ta’limda o‘qiyotganlar o‘qishini qay tartibda davom ettiradi?
O‘zbekiston | 11:14 / 17.06.2025
Qo‘rquv, shok va sarosima: Eronda nimalar bo‘lmoqda?
Jahon | 19:57 / 16.06.2025
So‘nggi yangiliklar
-
Moskva davlat universitetining Toshkent filialida 2025/26 o‘quv yili uchun qabul boshlandi
Jamiyat | 19:00
-
Mutaxassislar Apple, Google va Telegram'ning 16 milliard paroli sizib chiqqani haqida xabar berdi
Jahon | 18:59
-
Transport vositalarini nogironligi bo‘lgan shaxslar ehtiyojiga moslashtirish xarajatlari qoplab beriladi
O‘zbekiston | 18:29
-
Prezident Yakkabog‘dagi «Yangi O‘zbekiston» massivini ko‘zdan kechirdi
O‘zbekiston | 18:17
Mavzuga oid

12:17
Qashqadaryoda kombayn ichiga tushib ketgan uch yoshli bola shifoxonaga yotqizildi

08:26
DXX ta’lim sohasida poraxo‘rlik holatini aniqladi

08:27 / 16.06.2025
Soliq idorasi mansabdorining noqonuniy harakati fosh qilindi

17:14 / 11.06.2025