JSST Orolbo‘yida sog‘liqni saqlash tizimi bo‘yicha loyiha faoliyatini kengaytiradi

O‘zbekistonning Jyenevadagi BMT bo‘limi va boshqa xalqaro tashkilotlardagi doimiy vakili Eldiyor Toshmatov Jahon sog‘liqni saqlash tashkiloti (JSST) bosh direktori Tedros Gebreyyesus bilan uchrashdi.

Foto: "Dunyo" AA

"Dunyo" xabariga ko‘ra, uchrashuvda JSST bilan ikki va ko‘p tomonlama hamkorlik istiqbollari hamda bo‘lajak qo‘shma tadbirlar jadvali muhokama qilindi.

Orolbo‘yi hududida sog‘liqni saqlash tizimini rivojlantirishga qaratilgan loyiha faoliyatini kengaytirishga alohida e’tibor qaratildi.

Xususan, Qoraqalpog‘iston Respublikasi aholisi o‘rtasida tibbiy yordam ko‘rsatishni tashkil etish, yuqumli bo‘lmagan, respirator va onkologik kasalliklarning oldini olish va barvaqt aniqlashni yanada takomillashtirish zarurligi ta’kidlandi.

JSST va "Zamin" xalqaro jamoat fondi o‘rtasida tibbiyot sohasida qo‘shma loyihalarni amalga oshirish bo‘yicha hamkorlikni kengaytirishdan manfaatdorlik bildirildi.

Uchrashuv yakunida bosh direktor JSST O‘zbekiston tomoni bilan konstruktiv hamkorlikni yanada rivojlantirishga, shuningdek, sog‘liqni saqlash sohasida qo‘shma tadbirlarni tashkil etishni qo‘llab-quvvatlashini tasdiqladi.

#JSST #Orolbo‘yi