Dunyoda har soatda 100 nafarga yaqin odam yolg‘izlikdan vafot etadi - JSST

Dunyoda har soatda yuzga yaqin odam yolg‘izlikdan vafot etadi. Bu haqda Jahon sog‘liqni saqlash tashkilotining (JSST) so‘nggi hisobotida aytilgan.

Hujjatda qayd etilishicha, dunyodagi har oltinchi odam yolg‘izlikdan aziyat chekadi, bu esa ularning sog‘lig‘iga salbiy ta’sir qiladi. Yolg‘izlik bilan bog‘liq muammolar yiliga 871 mingdan ortiq o‘limga olib keladi - bu soatiga taxminan 100 kishi.

JSST ekspertlari yolg‘izlik va ijtimoiy izolyatsiya insult, yurak xastaligi, diabet, kognitiv funksiyalarning pasayishi va bevaqt o‘lim xavfini oshirishini batafsil bayon qildi.

JSST ta’kidlashicha, bundan tashqari, yolg‘iz odamlar depressiyaga tushish ehtimoli ikki baravar ko‘p. Yolg‘izlik ko‘pincha tashvish va o‘z joniga qasd qilish haqida salbiy fikrlarga olib keladi. Bundan tashqari, yolg‘iz odamlarga sifatli ta’lim olish yoki yaxshi ish topish qiyinroq.

Shunisi e’tiborga loyiqki, ko‘pincha yolg‘izlikni o‘smirlar va yoshlar (barcha holatlarning chorak qismigacha), shuningdek, kam ta’minlangan odamlar his qilishadi.

Yolg‘izlik sabablari orasida mutaxassislar sog‘lig‘ining yomonligi, past daromad va ta’lim darajasi, yetarli darajada infratuzilma va davlat siyosati yo‘qligi, shuningdek, raqamli texnologiyalarning ortib borayotgan rolini ta’kidlaydilar.

2023 yilda JSST yolg‘izlikni inson salomatligi uchun global tahdid deb e’lon qildi. Uning odamga zararli ta’siri kuniga 15 dona sigaret chekish bilan barobar.