DXX bolasini sotmoqchi bo‘lgan to‘rt ayolni tezkor tadbirda qo‘lga oldi

Davlat xavsizlik xizmati xodimlari tomonidan respublikaning turli hududlarida odam savdosiga qarshi tezkor tadbirlar o‘tkazildi. Tezkor tadbirlar davomida o‘z farzandini sotmoqchi bo‘lgan to‘rt nafar ayol ushlangan.

Ma’lum qilinishicha, Davlat xavfsizlik xizmatining Sirdaryo viloyati bo‘yicha boshqarmasi xodimlari tomonidan Bosh prokuratura huzuridagi departament va viloyat ichki ishlar boshqarmasi bilan hamkorlikda Guliston shahrida tezkor tadbir o‘tkazilgan. Unda 1991 yilda Buxoro viloyatida tug‘ilgan, Guliston shahrida vaqtincha yashovchi ayol joriy yilning 30 yanvar kuni tug‘ilgan o‘g‘il farzandini 40 ming AQSh dollariga sotgan vaqtida ashyoviy dalillar bilan ushlangan.

Surxondaryo viloyatida kuzatilgan holatda esa Termiz tumanida yashovchi, 1993 yilda tug‘ilgan ayol joriy yilning 25 yanvar kuni tug‘ilgan qiz farzandini o‘zining jinoiy sherigi bo‘lgan, 1982 yilda tug‘ilgan ayol bilan til biriktirib, Termiz shahrida 25 mln so‘mga sotgan vaqtlarida qo‘lga olingan.

Toshkent shahrida o‘tkazilgan tezkor tadbirda Chirchiq shahrida yashovchi, 1997 yilda tug‘ilgan ayol o‘zining 2018 yilda tug‘ilgan o‘g‘lini 3 ming AQSh dollariga sotgan vaqtida ushlangan.

Shuningdek, Namangan shahrida yashovchi 29 yoshli ayol 2014 yilda tug‘ilgan o‘g‘lini 18 ming AQSh dollariga sotishga kelishib, talab qilingan puldan 4 ming AQSh dollarini olgan vaqtida Davlat xavfsizlik xizmati hamda ichki ishlar organlari xodimlari tomonidan qo‘lga olingan. 

Hozirda mazkur shaxslarga nisbatan Jinoyat kodeksining 135-moddasi (odam savdosi) 3-qismi “a” bandi bilan jinoyat ishlari qo‘zg‘atilib, tergov harakatlari olib borilmoqda.