“Keksa” mashinani “yoshartirgan” tadbirkor

Marg‘ilonlik tadbirkor Rahmatullo Ro‘ziboyev tarixiy mashinalar ishqibozi. U 1939 yilda ishlab chiqarilgan eski GAZ M-1 mashinasini 1 000 dollarga sotib olib, qayta jihozlagan. 100 km masofaga 10-12 litr yoqilg‘i sarflaydigan “85 yoshli” mashina soatiga 140 km tezlikkacha harakatlana oladi.

{Yii::t(}

O'tkazib yuborish 6s

O'tkazib yuborish

Tadbirkor tarixiy mashinasi bilan bog‘liq ma’lumotlarni so‘zlab berdi:

“GAZ M-1 mashinasini 2020 yilda Andijondan 1000 dollarga sotib olganman. Avvalida “kuzov” qismi bor edi xolos.

Avtoulovni shu holga keltirish uchun ancha ter to‘kdim. Ehtiyot qismlar uchun 25 ming dollar sarfladim. “Bufer”, ballonni almashtirdim. Mashinaga xohlagan avtomobil motorini qo‘ysa bo‘ladi. Men esa “Volga” motorini joyladim. Mashina og‘irligi hisobiga 100 km.ga 10-12 litr yoqilg‘i sarflaydi. Soatiga 140 km tezlikkacha harakatlana oladi.

O‘zim asosan Trasker haydayman. Retro mashinam hatto Trasker’dan ham yumshoq. Yoshlikdan tarixiy filmlarga qiziqaman. Bu mashinani sotib olishim ham bejizga emas. Yaqin kelajakda urush davriga xos ana shunday filmlarga suratga tushishni reja qilib turibman.

Mashinaga xaridorlar ham chiqib turibdi. Lekin sotish niyatim yo‘q. Uni ko‘z qorachig‘idek asrab? avlodlarimga esdalik sifatida qoldirmoqchiman”, deydi u.

Ma’lumot o‘rnida, GAZ M-1 (“Emka”) avtomobillari 1936 yildan 1942 yilgacha Gorkiy avtozavodida 62 888 dona ishlab chiqarilgan.

Sarvar Ziyoyev,
Kun.uz
Montaj ustasi: Nizomjon Toshpo‘latov