Kreml Putinning to‘g‘ridan to‘g‘ri muloqoti va matbuot anjumanini birlashtiradi

O‘tgan yili Ukrainadagi harbiy harakatlar sababli bekor qilingan to‘g‘ridan to‘g‘ri muloqot va matbuot anjumani 2023 yilda bir vaqtda o‘tkaziladi.

Foto: RIA Novosti

Kreml matbuot kotibi Dmitriy Peskov 9 noyabr, payshanba kuni Rossiya prezidenti Vladimir Putinning to‘g‘ridan to‘g‘ri muloqoti va yirik matbuot anjumani 2023 yilda bir vaqtda o‘tkazilishini aytdi.

«Bu birlashtirilgan format bo‘ladi», dedi Peskov. Uning so‘zlariga ko‘ra, Kreml anjumanni yil oxirigacha o‘tkazishni rejalashtirgan, aniq sana keyinroq ma’lum qilinadi. Kreml format o‘zgarishi sabablariga aniqlik kiritmadi.

2022 yilda urush tufayli konferensiyalar bo‘lmagan

Putinning rossiyaliklarning savollariga javob beradigan to‘g‘ridan to‘g‘ri muloqot formati 2001 yildan beri mavjud. O‘tgan yillarda to‘g‘ridan to‘g‘ri muloqot odatda yozda, katta matbuot anjumani esa qishda bo‘lib o‘tdi. 2020 yilda, koronavirus pandemiyasi davrida faqat dekabr oyida matbuot anjumani o‘tkazildi, alohida to‘g‘ridan to‘g‘ri muloqot bo‘lmadi.

2022 yilda ikkala tadbir ham o‘tkazilmagan. Rossiya matbuotiga ko‘ra, bunga Rossiyaning Ukrainadagi harbiy harakatlari sabab bo‘lgan.

#Vladimir Putin #muloqot