Rossiyada qonuniy vakillari bo‘lmagan voyaga yetmagan shaxs O‘zbekistonga qaytarildi

O‘zbekistonning Vladivostokdagi Bosh konsulligi ko‘magida murakkab ahvolga tushib qolgan mamlakat fuqarosi Rossiyaning Uzoq Sharq mintaqasidan vatanga qaytarildi, deb xabar bermoqda «Dunyo».

Ma’lum bo‘lishicha, joriy yil 10 oktyabr kuni Vladivostokdagi «Parus nadejdi» maxsus sotsiallashtirish markazi xodimlari Bosh konsullikka murojaat qilib, 2006 yilda tug‘ilgan, voyaga yetmagan O‘zbekiston fuqarosi O.K. qonuniy vakillarisiz hamda Rossiya qonunchiligini buzgan holda Rossiyaning Primorskiy o‘lkasida bo‘lib turgani va mazkur muassasada saqlanayotganini bildirgan.

O‘zbekistonlik diplomatlar markaz rahbariyati bilan muzokaralar olib borgani natijasida, 13 oktyabr kuni voyaga yetmagan O.K. tog‘asi hamrohligida Qirg‘izistonga, so‘ngra chegara posti orqali Andijon viloyatiga o‘tkazilishi ta’minlangani holda ota-onasining huzuriga yetkazilgan.