O‘zbekiston | 07:47 / 16.08.2023
4403
2 daqiqa o‘qiladi

Qishloq xo‘jaligi mahsulotlari yetishtiruvchilar uchun xarajatlarning bir qismi qoplab beriladi

Vazirlar Mahkamasi qarori bilan hukumat ayrim qarorlariga qishloq xo‘jaligi mahsulotlari yetishtiruvchilarni davlat tomonidan qo‘llab-quvvatlash hamda subsidiya berish mexanizmlarini takomillashtirishga qaratilgan o‘zgartirish va qo‘shimchalar kiritildi.

Foto: Kun.uz

Prezidentning “Paxta xomashyosi yetishtiruvchilar faoliyatini yanada qo‘llab-quvvatlashning qo‘shimcha chora-tadbirlari to‘g‘risida”gi qaroriga muvofiq hujjatlarga davlat budjetidan quyidagilarning qoplab berilishini nazarda tutuvchi o‘zgartirishlar kiritilmoqda:

  • xorijdan olib kelingan va respublikamizda ishlab chiqarilgan lazerli qurilmaga ega avtomatlashtirilgan yer tekislagich agregatlarini sotib olgan qishloq xo‘jaligi mahsulotlari ishlab chiqaruvchilariga yer tekislagich agregatlari qiymatining 30 foizi;
  • paxta xomashyosi yetishtiriladigan maydonlarni nasos orqali sug‘orishda sarflanadigan elektr energiyasi xarajatlarining 50 foizigacha qismi.

Tegishli o‘zgartirishlar va qo‘shimchalar Vazirlar Mahkamasi qarori bilan tasdiqlangan fermer xo‘jaliklarining nasos agregatlari va sug‘orish quduqlari iste’mol qiladigan elektr energiyasi qiymatini qoplash uchun davlat budjetidan subsidiyalar ajratish tartibi to‘g‘risida nizomga kiritiladi. Bunda iste’molchilarga subsidiya ajratish uchun axborot va materiallarni yig‘ish, ularni ko‘rib chiqish va vakolatli organlar va tashkilotlar bilan kelishish “Agrosubsidiya” yagona axborot tizimi orqali amalga oshiriladi.

Qishloq xo‘jaligini mexanizatsiyalashni davlat tomonidan qo‘llab-quvvatlash tartibi to‘g‘risidagi nizom yangi tahrirda tasdiqlandi.

Subsidiyalar yangi va xarid qilingan kundan boshlab bir yil muddat davomida (hisobvaraq-faktura taqdim etilgan sanadan boshlab) taqdim etilgan arizaga muvofiq qishloq xo‘jaligi texnikasi va agregati uchun ajratiladi.

Mavzuga oid