Yevropa kengashi sammiti Zelenskiyning “tinchlik formulasi”ni qo‘llab-quvvatladi

Yevropa kengashiga a’zo davlatlar Volodimir Zelenskiy taklif qilgan “tinchlik formulasi”ni qo‘llab-quvvatlaydi va Ukraina va uning xalqiga “kerak bo‘lgan darajada” yordam beradi. Bu haqda Reykyavikdagi 4-sammitning 17 may, chorshanba kuni YeIga a’zo 46 davlat davlat va hukumat rahbarlari tomonidan qabul qilingan yakuniy deklaratsiyasida aytiladi. “Mas’uliyatsiz barqaror tinchlik bo‘lishi mumkin emas, shuning uchun biz Volodimir Zelenskiyning “tinchlik formulasida” bayon etilgan tamoyillarni qo‘llab-quvvatlaymiz”, — deyiladi hujjatda.

Shuningdek, Rossiya tajovuzi natijasida Ukrainaga yetkazilgan zararlar reyestrining ishlashi kelajakdagi kompensatsiya mexanizmining birinchi komponenti bo‘lishi ta’kidlangan. Ushbu reyestr Yevropa kengashi homiyligida joriy sammit chog‘ida imzolangan ochiq qisman kelishuv asosida tuzilyapti.

Sammit ishtirokchilari “Rossiya Federatsiyasining siyosiy va harbiy rahbariyatini Ukrainaga qarshi bosqinchilik urushi uchun javobgarlikka tortish” bo‘yicha amalga oshirilayotgan xalqaro sa’y-harakatlarni, shuningdek, “bosqinchilik jinoyatlari bo‘yicha maxsus tribunal tashkil etishdagi muvaffaqiyat”ni olqishladi. Yevropa kengashi maxsus tribunal yaratishga qaratilgan maslahatlashuvlar va muzokaralarda ishtirok etishga va’da berdi. Deklaratsiyaning alohida bandida Rossiya hukumatidan "Rossiya Federatsiyasi hududiga yoki Rossiya Federatsiyasi tomonidan vaqtincha nazorat qilinadigan yoki bosib olingan hududlarga majburan ko‘chirilgan yoki noqonuniy ravishda deportatsiya qilingan barcha tinch aholini, shu jumladan bolalarni zudlik bilan ozod etishni" talab qiladi.

Rossiyani javobgarlikka tortish masalasi Latviyaning Yevropa kengashi raisi sifatida keyingi olti oydagi asosiy ustuvor yo‘nalishlaridan biriga aylanadi. Bu haqda Latviya tashqi ishlar vaziri Edgar Rinkevich yakuniy matbuot anjumanida ma’lum qildi. Shu kuni Yevropa kengashi raisligini Rigaga rasmiy o‘tkazish marosimi bo‘lib o‘tdi. “Biz (Ukrainaning Rossiya Federatsiyasi bilan urushdagi yo‘qotishlari) reyestrini yaratish kabi qarorlar amalga oshirilishi kerakligini tushunamiz va bu borada barcha hamkorlarimiz va ukrainalik do‘stlarimiz bilan ishlaymiz”, — dedi Rinkevich. Uning ta’kidlashicha, "Rossiya agressiyadan zararni to‘lashi kerak", lekin shu bilan birga, Rossiya Federatsiyasi oliy rahbariyati "Ukrainada qilgan ishlari uchun ham javob berishi kerak".