Европа кенгаши саммити Зеленскийнинг “тинчлик формуласи”ни қўллаб-қувватлади

Европа кенгашига аъзо давлатлар Володимир Зеленский таклиф қилган “тинчлик формуласи”ни қўллаб-қувватлайди ва Украина ва унинг халқига “керак бўлган даражада” ёрдам беради. Бу ҳақда Рейкявикдаги 4-саммитнинг 17 май, чоршанба куни ЕИга аъзо 46 давлат давлат ва ҳукумат раҳбарлари томонидан қабул қилинган якуний декларациясида айтилади. “Масъулиятсиз барқарор тинчлик бўлиши мумкин эмас, шунинг учун биз Володимир Зеленскийнинг “тинчлик формуласида” баён этилган тамойилларни қўллаб-қувватлаймиз”, — дейилади ҳужжатда.

Шунингдек, Россия тажовузи натижасида Украинага етказилган зарарлар реестрининг ишлаши келажакдаги компенсация механизмининг биринчи компоненти бўлиши таъкидланган. Ушбу реестр Европа кенгаши ҳомийлигида жорий саммит чоғида имзоланган очиқ қисман келишув асосида тузиляпти.

Саммит иштирокчилари “Россия Федерациясининг сиёсий ва ҳарбий раҳбариятини Украинага қарши босқинчилик уруши учун жавобгарликка тортиш” бўйича амалга оширилаётган халқаро саъй-ҳаракатларни, шунингдек, “босқинчилик жиноятлари бўйича махсус трибунал ташкил этишдаги муваффақият”ни олқишлади. Европа кенгаши махсус трибунал яратишга қаратилган маслаҳатлашувлар ва музокараларда иштирок этишга ваъда берди. Декларациянинг алоҳида бандида Россия ҳукуматидан "Россия Федерацияси ҳудудига ёки Россия Федерацияси томонидан вақтинча назорат қилинадиган ёки босиб олинган ҳудудларга мажбуран кўчирилган ёки ноқонуний равишда депортация қилинган барча тинч аҳолини, шу жумладан болаларни зудлик билан озод этишни" талаб қилади.

Россияни жавобгарликка тортиш масаласи Латвиянинг Европа кенгаши раиси сифатида кейинги олти ойдаги асосий устувор йўналишларидан бирига айланади. Бу ҳақда Латвия ташқи ишлар вазири Эдгар Ринкевич якуний матбуот анжуманида маълум қилди. Шу куни Европа кенгаши раислигини Ригага расмий ўтказиш маросими бўлиб ўтди. “Биз (Украинанинг Россия Федерацияси билан урушдаги йўқотишлари) реестрини яратиш каби қарорлар амалга оширилиши кераклигини тушунамиз ва бу борада барча ҳамкорларимиз ва украиналик дўстларимиз билан ишлаймиз”, — деди Ринкевич. Унинг таъкидлашича, "Россия агрессиядан зарарни тўлаши керак", лекин шу билан бирга, Россия Федерацияси олий раҳбарияти "Украинада қилган ишлари учун ҳам жавоб бериши керак".