O‘zbekiston Badiiy akademiyasining qariyb 1,5 mlrd so‘mlik davlat xaridi bekor qilindi

8 may kuni O‘zbekiston Badiiy akademiyasi buyurtmachiligida Alisher Navoiyning bronza haykalini yaratish va Qozog‘iston Respublikasining Ostona shahrida o‘rnatish xizmati yuzasidan 1 mlrd 416 mln so‘mlik davlat xaridi o‘tkazilgan. Ammo mazkur xarid Korrupsiyaga qarshi kurashish agentligining o‘rganishlaridan so‘ng bekor qilingan.

Ma’lum qilinishicha, ushbu davlat xaridini amalga oshirish jarayonida buyurtmachi tomonidan O‘zbekiston Respublikasi “Davlat xaridlari to‘g‘risida”gi qonunning 10-moddasi (raqobat va xolislik prinsipi), 14-moddasi (manfaatlar to‘qnashuvi), 46-moddasi (davlat xaridlari jarayonidagi cheklovlar) talablariga amal qilinmagan va boshqa qonunbuzilishi holatlariga ham yo‘l qo‘yilgan. Xususan, xaridda ishtirok etgan 3 nafar talabgorning hujjatlari xarid komissiyasining raisi va to‘rt nafar a’zolari foydalangan kompyuter orqali elektron platformaga yuklangan.

Mazkur holatlar bo‘yicha davlat xaridi o‘tkazilgan kunning o‘zida xarid komissiyasining bayonnomasini bekor qilish to‘g‘risida buyurtmachiga taqdimnoma kiritilgan. To‘plangan hujjatlar esa qonuniy chora ko‘rish uchun Bosh prokuratura huzuridagi Iqtisodiy jinoyatlarga qarshi kurashish departamentiga yuborilgan.

Agentlik taqdimnomasiga binoan akademiya tomonidan 11 may kuni xarid komissiyasining bayonnomasi bekor qilingan.

Oldinroq Maktabgacha va maktab ta’limi vazirligining ta’minot xizmati tomonidan 2023/24-o‘quv yili uchun ingliz tili fanidan 1-11-sinf mashq daftarlari, darsliklar sotib olish maqsadida o‘tkazilgan davlat xaridi ham qimmat narx taklif qilgan tadbirkorlik sub’yekti g‘olib deb topilgani uchun bekor qilingandi.